دەروازەی مونزرییە جارێکی دیکە دەکرێتەوە

ئاڤا نیوز

دوای داخستنی بەهۆی جەنگی نێوان ئیسرائیل و ئێرانەوە، دەروازەی مونزرییە جارێکی دیکە کرایەوە و پێشبینیش دەکرێت جموجۆڵی گەشتیاری لەڕۆژانی داهاتوودا زیاتر بێت.

چیرۆکی سەرەکی: بەهۆی جەنگی 12 ڕۆژەی لەگەڵ ئیسرائیلدا، ئێران ئاسمانی وڵاتەکەی و سەرجەم دەروازە سنووریەکانی لەگەڵ وڵاتانی دراوسێ بەتەواوی داخست و هەموو جموجۆڵێکی گەشتیاریشی لەگەڵ ئەو وڵاتانە ڕاگرت.

 

زانیاریی بەدەستهاتوو: سەرچاوەیەک لەپارێزگای دیاله ڕایگەیاند: جموجۆڵی بە لێشاوی هاووڵاتیانی عێراقی بەمەبەستی گەشتکردن، وەرگرتنی چارەسەری پزیشکی و سەردانی مەزارگە ئاینییەکان لە ڕێگەی دەروازەی مونزرییەوە گەڕایەوە دۆخی ئاسایی خۆی پێش ڕووداوەکانی 13ی حوزەیرانی ئەم مانگە.

 

زانیاریی زیاتر: سەرچاوەکە ئاماژەی بە وەکرد، ڕەنگە ڕۆژانی داهاتوو ژمارەی گەشتیارانی عێراقی لەڕێی ئەو دەروازەیەوە هاوکات لەگەڵ پشووی هاویندا زیاتر بێت، پێشبینیش دەکرێت بەبۆنەی مەراسیمەکانی مانگی موحەرەمەوە ڕۆژانە هەزاران زیارەتکاری ئێرانی لەو دەروازەیەوە بێنە نێو خاکی عێراق و سەردانی کەربەلا بکەن.

 

ئەمەش بزانە: دەروازەی سنووری مونزرییە دەکەوێتە باکووری ڕۆژهەڵاتی قەزای خانەقین لە پارێزگای دیالە، دەروازەکە عێراق لەگەڵ دەروازەی سنووریی خەسرەوی بە ئێرانەوە دەبەستێتەوە.