تێستی پڕۆژەی فریاگوزاریی خێرای ئاوی هەولێر دەستپێدەکات

ئاڤا نیوز

تێستی پڕۆژەی فریاگوزاریی خێرای ئاوی هەولێر دەستپێدەکات، لە قۆناغی یەکەم کارەبا دراوە بە وێستگەی سەرەکی و دوو وێستگەکەی دیکە، لە ناوەڕاستی مانگی حەوت ئاو دەگات بە ژمارەیەک گەڕەکی شاری هەولێر.

وێنە گەورەکە: بە مەبەستی چارەسەرکردنی کێشەی کەمئاوی بەتایبەت لە وەرزی هاوین لە شاری هەولێر و دەوروبەری، حکومەتی هەرێمی کوردستان پڕۆژەی فریاگوزاریی خێرای ئاوی هەولێری جێبەجێکرد و بڕیارە لە ئایندەیەکی نزیک پڕۆژەکە بە تەواوی بکەوێتە کار.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤای گوت، "هەرسێ وێستگەی ئینتەیک، وێستگەی چارەسەرکردنی ئاو  و وێستگەی دابەشکردنی سەرەکی ئاو، کارەبایان بۆ دابینکراوە و لەماوەی 15 ڕۆژ تێست دەبێت، ناوەڕاستی مانگی حەوت ئاو بۆ گەڕەکەکان دابین دەکرێت، ناوچەکانی شەقامی مووسڵی کۆن و نوێ، شەقامی کۆیە، شەقامی مەخموور و شەقامی کۆیە، دورووبەری شەقامی 120 مەتری  دەگرێتەوە."

باکگراوند: ‌8ـی ئه‌يلوولى 2024، له‌لايه‌ن سەرۆکوەزیران مەسرور بارزانی، به‌ردى بناغه‌ى پرۆژه‌ى فرياگوزاریی خێراى ئاوى هه‌ولێر دانرا. پرۆژەکە بە گوژمەی نزیكەی 480 ملیۆن دۆلار جێبەجێ دەکرێت و به‌ ته‌واوبوونى پرۆژه‌كه،‌ كێشه‌ى كه‌مئاوى له‌ شارى هه‌ولێر به‌ ڕێژه‌ى 100% چاره‌سه‌ر ده‌بێت.