حەماس مەرجەکانی بۆ ڕەزامەندی لەسەر ئاگربەست لە غەززە ئاشکرا دەکات

ئاڤا نیوز

بزووتنەوەی حەماس مەرجە سەرەکییەکانی بۆ ڕەزامەندی لەسەر ئاگربەست لە غەززە ئاشکرا دەکات کە داواکاریی سیاسی، دارایی و گەرەنتیی نێودەوڵەتی لەخۆدەگرێت.

وێنە گەورەکە: ئەگەرچی ئیسرائیل و ئەمریکای هاوپەیمانی پێداچوونەوە بەو پێشنیازە دەکەن کە حەماس پەسەندی کردووە، بەڵام مەرج و داواکارییەکان لەنێوان حەماس و ئیسرائیل ئاماژە بەوە دەکەن، هێشتا لەسەر پرسە سەرەکییەکان ناکۆکن کە پێویستن بۆ گەیشتن بە ئاگربەست.

زانیاریی بەدەستهاتوو: بەگوێرەی ئەو زانیارییانەی لە سەرچاوەیەکی بزووتنەوەکەوە بە ماڵپەڕی "سکای نیوز" گوتراوە، گرنگترین مەرجەکان بریتین لە: پاراستنی نووسینگە سیاسییەکانی و دەستبەسەردا نەگرتنی پارەکانی، هەبوونی ڕۆڵ لە بەڕێوەبردن و ئاسایشی داهاتووی کەرتی غەززە و گرنگتر لە هەموویان، وەرگرتنی گەرەنتییەکی ڕوونی ئەمریکا بۆ کۆتاییهێنان بە جەنگ.

لە بەرامبەردا: واشنتۆن ئامادەیی نیشانداوە ببێتە گەرەنتیکار، بەڵام مافی وەڵامدانەوەی سەربازی بۆ ئیسرائیل دەهێڵێتەوە ئەگەر ئاگربەستەکە سەرنەکەوێت.

ئەوەی پێویستە بیزانیت: ڕێککەوتنە پێشنیازکراوەکە باس لە ئازادکردنی بارمتەکان و دوورخستنەوەی سەرکردەکانی حەماس دەکات، لە بەرامبەر ئەوەی ئیسرائیل بیر لە "چارەسەری دوو دەوڵەت" بکاتەوە، بە مەرجی چاکسازی لەناو دەسەڵاتی فەڵەستینیدا.