پرۆسەی گەڕان بەدوای تەرمی ئاڤێستا کۆتایی پێدێت

ئاڤا نیوز

نزیکەی 90 ڕۆژ گەڕان بەدوای تەرمی مامۆستا ئاڤێستا بەردەوامە، بڕیارە لەچەند ڕۆژی داهاتوودا تیمەکانی بەرگری شارستانیی سۆران بەفەرمی، پرۆسەی گەڕان بوەستێنن و کارەکانیان کۆتایی پێبهێنن.

چیرۆکی سەرەکی: ڕۆژی 5ـی نیسان، ئاڤێستا یوسف بەرزنجی، تەمەن 27 ساڵ و دانیشتووی شاری هەولێر، کەوتە نێو ڕووباری تەنگاتوور لە قەزای مێرگەسۆر، لەوساوە تاوەکو ئێستا دەیان تیم بەشێوەیەکی بەردەوام لە زەوی و ئاسمان بەدوایدا گەڕان، بەڵام بێ سۆراغ بوو.

لێدوانی فەرمی: ڕەوەند هاودییانی، وتەبێژی بەرگریی شارستانیی سۆران بە ئاڤای گوت، "بڕیارە ڕۆژی 05-07-2025 دوای 90 ڕۆژ گەڕان پرۆسەکە بوەستێنین، ئێستا ڕۆژانە هەشت تیم بەسەر ناوچەکاندا دابەشکراون و بەدوایدا دەگەڕێن."

وتەبێژی بەرگریی شارستانیی سۆران، دەڵێت، "ئەو کاتەی مامۆستا ئاڤێستا کەوتە نێو ڕووبار بەهۆی بارانبارینەوە ئاستی ئاوەکە بەرزتر بوو و لمێکی زۆر هەبوو، گومان دەکەین تەرمەکەی لە یەکێک لە ئەشکەوتەکان گیری خواردبێت و لەژێر لمدا ون بووبێت."

ئەوەی پێویستە بیزانیت: لە یەکەم ڕۆژی ونبوونی ئاڤێستا یوسف، ڕۆژانە 150 بۆ 200 کارمەندی بەرگریی شارستانی بەسەر 30 تیمدا دابەشکرابوون و لە ئاسمان و زەوی بەدوایدا دەگەڕان، مانگی یەکەم بەوشێوەیە بوو، مانگی دووەم تیمەکان بۆ نیوە کەمکرانەوە، لە مانگی سێیەم چوار بۆ هەشت تیم ڕۆژانە بەردەوامن دەگەڕان.

قووڵتر: سرووشتی ڕووباری تەنگاتوور، ئاوەکەی سارد و بەرزە و ژێرەوەی ڕووبارەکە ناوچەیەکی شاخاویی سەختە، پڕیەتی لە ئەشکەوت کە گیرخواردنی هەر تەرمێک دەرهێنانەوەی ئاسان نابێت، پێشووتر ڕووداوی لەو شێوەیە لە ڕووباری زێی گەورە تۆمارکراون، بەهاری ساڵی 1989 کوڕ و باوکێک بە ناوەکانی یونس حەمەدەمین و ڕەسوڵ یونس بە پیک ئەپ شیش دەگوزانەوە، لەڕێگای گەلی لەسەر پردێک دەکەونە نێو ڕووبار ئێستاشی لەگەڵدا بێت ئۆتۆمبێلەکەش نەدۆزرایەوە و گومان دەکرێت لە ئەشکەوتەکانی ژێریدا گیریان خواردبێت.

زانیاریی زیاتر: جگە لە تەرمی مامۆستا ئاڤێستا دوو تەرمی دیکەش هەر لەمساڵدا لە زێی گەورە ون بوون، تاوەکو ئێستا نەدۆزراونەتەوە، یەکێکیان لە باکووری کوردستانەوە هاتووە و گەڕان بەدوایاندا بەردەوامە.