ئیسماعیل قائانی پەیامێک ئاراستەی هێزە سەربازییەکانی وڵاتەکەی دەکات

ئاڤا نیوز

فەرماندەی فەیلەقی قودسی سوپای پاسدارانی ئێران لە مەراسیمی ناشتنی تەرمی قوربانیانی هێرشەکانی ئیسرائیل پەیامێکی ئاراستەی خەڵک و سوپای وڵاتەکەی دەکات و داوا دەکات هەمووان لە ژێر فەرمانی ڕابەری باڵای ئێران بن.

وێنە گەورەکە: لە جەنگی 12 ڕۆژەی نێوان ئیسرائیل و ئێران، 16 زانای ئەتۆمی و 30 فەرماندەی باڵای سەربازی ئێران کوژران، ئەمڕۆ مەراسیمی ناشتنی تەرمی قوربانییەکانی جەنگەکە بە ئامادەبوونی هەزاران کەس بەڕێوەچوو.

لێدوانی فەرمی: ئیسماعیل قائانی، فەرماندەی فەیلەقی قودسی سوپای پاسداران لە مەراسیمەکەدا ڕایگەیاند، "تاوەکو قۆناغی ئێستا بەسەرکەوتنەوە هاتووین و لێرە بەدواوە بە هێزی زیاترەوە هەنگاو دەنێین و بەرەو پێش دەڕۆین، پەیامی من بۆ هەموو هێزە سەربازییەکان ئەوەیە دەبێت هەمووان لە ژێر فەرمانی ڕابەری باڵای ئێران بین و لە ژێر ڕێنماییەکانی ئەو هەموو کارەکان بە دروستی بەڕێوەدەچن".

لەلایەکی دیکەوە: عەباس عێراقچی، وەزیری دەرەوەی ئێران لە مەراسیمەکەدا ڕایگەیاند: ئێرانییەکان خوێنیان بەخشی، بەڵام خاکیان نەدۆڕاند، ئێرانییەکان گیانی ڕۆڵەکانیان بەخشی، بەڵام شکۆیان نەدۆڕاند، لە ژێر بۆمبارانکردنی دوژمن وەستانەوە، بەڵام خۆیان بە دەستەوە نەدا.