ژمارەیەک جووتیاری مەخموور لە وەرگرتنی گەنم بێبەش دەکرێن

ئاڤا نیوز

 

بەهۆی دەرکردنی هەندێک ڕێنمایی، ژمارەیەک جووتیاری ناحیەی دیبەگەی سەر بە سنووری قەزای مەخموور، لە وەرگرتنی گەنم بێبەش دەکرێن.

 

وێنە گەورەکە: ئەمساڵ بە بیانووی ئەوەی بەشێک لە ناوچە کوردستانییەکانی دەرەوەی ئیدارەی هەرێمی کوردستان لە سنووری پارێزگای نەینەوا، گرێبەستە کشتوکاڵییەکانیان لەسەر پارێزگای هەولێر و دهۆک کردووە، دوای دروێنەی گەنم دەرگای سایلۆکان بە ڕوویاندا داخرا و گەنمیان لێوەرنەگیرا. دواتر ئەنجوومەنی وەزیرانی عێراق بڕیاری دا بەدەر لە ڕێنماییەکان، 86 هەزار تۆن گەنمی جووتیارانی سنووری قەزای مەخموور و ناحیەکانی وەربگیرێت.

 

لێدوانی فەرمی: جاسم ئیسماعیل، جووتیارێکی سنووری دیبەگەیە، بە ئاڤای گوت: خۆم زیاتر لە 100 دۆنم گەنمم چاندبوو، باوکم و سێ براكەشم زیاتر لە 500 دۆنم زەوییان بە گەنم داچاندبوو، کەچی تەنیا ناوی من گەڕاوەتەوە و باوکم و براکانم لە وەرگرتنی گەنم بێبەش کراون، نزیکەی 100 جووتیاری دیکەی سنوورەکەش ناویان نەگەڕاوەتەوە و بە پێچەوانەوە هەندێ لەو جووتیارانەی تۆمار کراون دووجار ناویان لە لیستی وەرگرتنی گەنم گەڕاوەتەوە.

 

هۆکارە زانراوەکان: ئەو فەرمانبەرەی لیستی جووتیارانی دیبەگەی ئامادە کردووە، ڕاژەی لەسەر حکومەتی عێراقە و ساڵی ڕابردوو لەسەر ئاسانکاری بۆ جووتیاران سزا دراوە، بۆیە ئەمساڵ هەر جووتیارێک هەموو مەرجە داواکراوەکانی وەرگرتنی گەنمیان تێدا نەبووبێت، تۆماری نەکردوون.

 

ڕێککەوتنەکە بەمشێوەیە: ڕێنماییەکان بۆ تۆمارکردنی جووتیارانی سنووری مەخموور ئەمانەن:

ـ گرێبەستی نوێی کردبێتەوە.

ـ گرێبەستەکە دەبێت بەناوی خۆیەوە بێت.

ـ مۆڵەتی بەناوی خۆیەوە بێت.

ـ بریکارنامەكەی پەسەند ناكرێت جگە لە کەسی یەکەم یان دووەمی نزیکی خۆی نەبێت.

ـ ئەو زەویانەی وەرەسەن، دەبێت هەموو ئەوانەی وەرەسە دەیانگرێتەوە، بریکارنامە بۆ یەک کەس بکەن.

 

لە لایەکی دیکەوە: نووری سەعید، بەڕێوەبەری بەشی کشتوکاڵی دیبەگە بە ئاڤا میدیای گوت: کاتێک ڕەزامەندی درا گەنمی ئەم سنوورە لە دەرەوەی ڕێنماییەکان وەربگیرێت، ماوەی 24 کاتژمێرمان بۆ دیاری کرا تا لیستەکان ڕادەست بکەین، بۆیە ئەوەندەی فریاکەوتین ناومان لە لیستێک تۆمار کرد و ڕەوانەمان کرد.

 

چارەسەرەکان: بەڕێوەبەری بەشی کشتوکاڵی دیبەگە گوتی: پێداچوونەوە بە لیستەکان دەکەین، ئەو جووتیارانەی شایستەن و ناویان تۆمار نەکراوە، لە جێگەی ناوە دووبارەکان دادەنێین، ئەگەر ناوەکانیش زیاتر بوون لە ناوە دووبارەکان بە لیستێک بۆ حکومەتی عێراقی بەرز دەکەینەوە، ئەمەش پێویستی بە ڕەزامەندیی ئەنجوومەنی وەزیرانی عێراق هەیە.