کەوتنەوەی ئاگرێک لە ماوەت 150 سندووقی بەخێوكردنی هەنگ دەسووتێنێت

ئاڤا نیوز

بەهۆی جێهێشتنی پاشماوەی ئاگر لەلایەن گەشتیارانەوە، ئاگرێكی گەورە لە سنووری گوندی غەزینەی سەر بە شارۆچكەی ماوەت كەوتەوە، بووە هۆی سووتانی 150 سندووقی بەخێوكردنی هەنگ، پۆلیس بەدوای دۆزینەوەی تۆمەتبارانن.

چیرۆكی سەرەكی: ئەمڕۆ دووشەممە 30ـی حوزەیران، ئاگرێك لە سنووری گوندی غەزینە سەر بە شارۆچكەی ماوەت كەوتەوە و نزیكەی 50 دۆنم زەوی گرتەوە، دەستبەجێ هێزێکی بەشی پۆلیسی دارستانی ماوەت گەیشتنە شوێنی ڕووداوەكە، بە هەماهەنگی و هاوكاریی بەڕێوەبەرایەتیی ئاگركوژێنەوەی ماوەت و خەڵكی گوندەكە، توانرا ئاگرەكە كۆنتڕۆڵ بكەن.

لێدوانی فەرمی: هێمن کەمەرخان، لە بەشی ڕاگەیاندنی پۆلیسی دارستان و ژینگەی سلێمانی بە ئاڤای ڕاگەیاند، بەهۆی ئاگرەكەوە بە ڕووبەری 50 دۆنم، پووش و پاوان و داری سروشتی سووتان، هەروەها 150 سندووقی بەخێوكردنی هەنگ و كۆمەڵێك كەلوپەلی هاووڵاتیان لەناوچوو.

هۆكارە زانراوەكان: بەپێی زانیارییەكانی پۆلیسی دارستانی ماوەت، هۆکاری ئاگرەکە بەهۆی پاشماوەی ئاگری گەشتیارانەوە بووە و لێکۆڵینەوە و بەدواداچوون بۆ دۆزینەوەی تۆمەتباران بەردەوامە.