مەسرور بارزانی و باڵیۆزی فەرەنسا جەخت لە گرنگیی ڕێزگرتن لە قەوارەی دەستووریی هەرێمی کوردستان دەکەنەوە

ئاڤا نیوز

سەرۆکوەزیران مەسرور بارزانی و باڵیۆزی فەرەنسا لە عێراق کۆبوونەوە و هەردوولا لەسەر گرنگیی ڕێزگرتن لە قەوارەی دەستووریی کوردستان، پێویستیی پاراستنی ئاسایش، ئارامی و سەقامگیریی ناوچەکە هاوڕابوون.

چیرۆکی سەرەکی: ئەمڕۆ دووشەممە 2025-06-30، سەرۆکوەزیران مەسرور بارزانی، پێشوازی لە پاتریک دۆرێڵ، باڵیۆزی فەرەنسا لە عێراق کرد، لە دیدارەکەدا کە یان برێم کونسوڵی گشتیی فەرەنسا لە هەرێمی کوردستان ئامادەی بوو، بیروڕا لەبارەی پێشخستنی زیاتری پەیوەندیی دوولایەنە و دۆخی گشتیی عێراق و ناوچەکە ئاڵوگۆڕ کرا.

ڕاگەیێنراوی فەرمی: ماڵپەڕی حکومەتی هەرێمی کوردستان بڵاویکردەوە، تەوەرێکی سەرەکی کۆبوونەوەکە تایبەت بوو بە پێویستیی چارەسەرکردنی کێشەکانی نێوان هەرێمی کوردستان و حکومەتی فیدراڵ، لەمبارەیەوە جەخت لە گرنگیی ڕێزگرتن لە قەوارەی دەستووریی هەرێمی کوردستان، دابینکردنی مافە دەستووری و شایستە داراییەکانی خەڵکی کوردستان کرایەوە.