وەزارەتی ناوخۆ بڵاوكردنەوەی وێنە بە جلی سەربازی قەدەغە دەكات

ئاڤا نیوز

وەزارەتی ناوخۆی حكوومەتی هەرێمی كوردستان، بڵاوكردنەوەی وێنە و ڤیدیۆ بە جلی فەرمیی سەربازییەوە لە ئەفسەر و پۆلیس قەدەغە دەكات.

لێدوانی فەرمی: عەقید كارزان ئەمیر، وتەبێژی بەڕێوەبەرایەتیی گشتیی پۆلیسی هەرێمی كوردستان بە ئاڤا میدیای ڕاگەیاند: بەڕێوەبەرایەتیی گشتیی پۆلیسی هەرێمی كوردستان گشتاندنێكی ئاراستەی سەرجەم بەڕێوەبەرایەتییەكانی پۆلیس كردووە و لەو ڕێگەیەوە سەرجەم ئەفسەر و كارمەندانی پۆلیس ئاگادار كراونەتەوە كە بڵاوكردنەوەی وێنە بە جلی فەرمی لە تۆڕە كۆمەڵایەتییەكان بۆ بابەتە كەسییەكان قەدەغەیە.

- نابێت بە هیچ شێوەیەك لێدوان بۆ هیچ كەناڵێكی بینراو و بیستراو و ناوخۆ و دەرەكی و تۆڕە كۆمەڵایەتییەكان بدرێت بێ وەرگرتنی ڕەزامەندیی سەرووی خۆیان.

- وتەبێژەكانی پۆلیس و بەڕێوەبەرایەتیی ڕاگەیاندن بۆیان نییە وێنەی خۆیان بە جلی سەربازی یاخود گشتاندن و پۆستی فەرمی لەلاپەڕەی خۆیان لە تۆڕە كۆمەڵایەتییەكان بڵاو بكەنەوە، بەڵكو تەنیا دەتوانن لە لاپەڕەی فەرمیی زانیاری و بابەتەكان بڵاو بكەنەوە.

- بە هەموو شێوەیەك قەدەغەیە ئەفسەر و كارمەندانی پۆلیس لایڤ بكەنەوە یاخود بەشداری لە لایڤەكان بكەن، لەبەر ئەوەی دەبێتە هۆی لەكەداركردن و ناشیرنكردنی كەسایەتیی  هێزەكانی ئاسایشی ناوخۆ.