فراکسیۆنەکانی پارتی و یەکێتی لەبارەی هێرشەکانی سەر کەرکووک و سلێمانی داواکارییەکی خێرا لە سوودانی دەکەن

ئاڤا نیوز

هەردوو فراکسیۆنی پارتی دیموکراتی کوردستان و یەکێتیی نیشتمانیی کوردستان لە پەرلەمانی عێراق، داوا لە سوودانی دەکەن لێکۆڵینەوەی بەپەلە لە هێرشەکان بکرێت و شوێنی هێرشەکان و بکەرەکان ئاشکرا بکرێن و سەر و ماڵی هاووڵاتیانی مەدەنی پارێزاراو بێت.

وێنە گەورەکە: هێرشەکەی ئەمشەوی سەر پارێزگای سلێمانی و هێرشەکانی دوێنێ شەو بۆ سەر فڕۆکەخانەی کەرکووک و پاڵاوگەی بێجی و کەمپێکی ئاوارەکان لە زاخۆ ترس و دڵەڕاوکێی بۆ خەڵکی باشووری کوردستان دروست کردووە، خەڵک و لایەنە سیاسییەکان نیگەرانن لەوەی دۆخی ناوچەکە تێکبچێت و هێرشەکان لە داهاتوودا گەورەتر و فراوانتر بن.

ڕاگەیێنراوی فەرمی: د. شاخەوان عەبدوڵڵا، جێگری سەرۆکی پەرلەمانی عێراق، هێرشە تیرۆریستییەکانی سەر پارێزگای کەرکووک و هەڵدانی ژمارەیەک مووشەک بۆ سەر گەڕەکەکانی نیشتەجێبوون و دامەزراوە حکومییەکانی ئەو شارە سەرکۆنە دەکات و داوا لە سوودانی دەکات لێپێچینەوە لە ڕووداوەکە بکات. 

شاخەوان عەبدوڵڵا  بەپێویستی دەزانێت دەسەڵاتدارانی ئەمنی، سەربازی و ئیداریی پارێزگاکان ڕێوشوێنی پێویست بۆ چارەسەرکردنی ئەو پێشێلکارییانە و ڕێگریکردن لە دووبارەبوونەوەی بگرنەبەر.

 جەختیش دەکاتەوە لە پێویستیی پاراستنی کۆنترۆڵکردنی دۆخەکە و بەردەوامبوونی هەوڵەکان بۆ پاراستنی هاووڵاتیانی سڤیل و پاراستنی سەقامگیری دەکاتەوە.

شاخەوان عەبدوڵڵا لە ڕاگەیێنراوەکەیدا باسی هێرشەکەی ئەمشەوی سلێمانی نەکردووە، چونکە ڕاگەیێنراوەکە پێش هێرشەکە بڵاوکراوەتەوە.

 

لەلایەکی دیکەوە: فراکسیۆنی یەکێتی لە پەرلەمانی عێراق لە ڕاگەیێنراوێکدا هێرشەکەی ئەمشەوی سەر شاری سلێمانی و دوێنێ شەوی سەر شاری کەرکووکی بەتووندی سەرکۆنە کرد. 

فراکسیۆنی یەکێتی داوا لە محەممەد شیاع سوودانی، سەرۆکوەزیران و فەرماندەی گشتیی هێزە چەکدارەکانی عێراق دەکات بەپەلە لیژنەیەکی لێکۆڵینەوە پێکبهێنێت بۆ دیاریکردنی سەرچاوەی هەڵدانی فڕۆکە بێفڕۆکەوان و مووشەکەکان و ئەو لایەنەی لەپشت هێرشەکانەوەن.

باکگراوند: شەوی ڕابردوو لە ماوەی کاتژمێرێکدا بە کاتیۆشا و درۆنی بۆمبڕێژکراو هێرش کرایە سەر فڕۆکەخانەی کەرکووک، پاڵاوگەی بێجی و کەمپی دەرکاری سەر بە ئیدارەی سەربەخۆی زاخۆ، بەرپرسانی کەرکووک و دەزگا ئەمنییەکانیش پشتڕاستیان کردەوە هێرشەکە لە ناوخۆی عێراقدا کراوە.

ئەمشەویش بە دوو درۆنی بۆمبڕێژکراو  هێرش کرایە سەر بارەگای یەکەی 70ی پێشمەرگە و دژەتیرۆری سلێمانی لە تاسڵوجە، هەردوو درۆنەکەش تێکشکێنران و لەلایەن هێزە ئەمنییەکانەوە خرانە خوارەوە، ڕووداوەکەش هیچ زیانێکی گیانی لێ نەکەوتەوە.