بە دوو درۆنی بۆمبڕێژکراو هێرش دەکرێتە دژەتیرۆری سلێمانی و یەکەی 70

ئاڤا نیوز

ئەمشەو بە دوو درۆنی بۆمبڕێژکراو  هێرش کرایە سەر بارەگای یەکەی 70ی پێشمەرگە و دژەتیرۆری سلێمانی لە تاسڵوجە.  وتەبێژی دەزگای ئاسایش  دەڵێت، هەردوو درۆنەکە تێکشێنراون و هیچ زیانێکی گیانی نەبووە.

چیرۆکی سەرەکی: کاتژمێر 10:30 خولەکی ئەمشەو دەنگی بەهێز لە سلێمانی بیستران. دواتر دەرکەوت بە دوو درۆنی بۆمبڕێژکراو هێرش کراوەتە سەر بارەگای یەکەی 70ی پێشمەرگە و بارەگای دژەتیرۆی سلێمانی لە تاسڵووجە، هەردوو درۆنەکەش دوای 20 خولەک سووڕانەوە بەسەر بارەگاکان لەلایەن هێزە ئەمنییەکان تەقەیان لێ کراوە و تێکشکێنراون.

زانیاریی بەدەستهاتوو: هەردوو بارەگاکە دەکەونە نزیک یەکتر، لە ناوچەی تاسڵوجەن و نزیکەی 500 مەتر لە یەکەوە دوورن. درۆنەکان لە چۆڵەوانی کەوتوونەتە خوارەوە، بۆیە هیچ زیانێکی گیانی نەبووە. تەنیا لەو ناوچانەی کەوتوونەتە خوارەوە ئاگری لێ کەوتووەتەوە و دوای ماوەیەک ئاگرەکە کۆنترۆڵ کراوە.

لێدوانە فەرمییەکان: عەقید سەلام عەبدولخالق، وتەبێژی دەزگای ئاسایشی هەرێم/سلێمانی بە ئاڤای ڕاگەیاند:  هەردوو درۆن بۆمبڕێژکراو بوون و لەلایەن هێزە ئەمنییەکان تەقەیان لێ کراوە و تێکشکێنراون. ڕووداوەکەش هیچ زیانێکی گیانی لێ نەکەوتووەتەوە. تاوەکو ئێستاش سەرچاوەی درۆنەکان و بکەرانی پشت هێرشەکان نەزانراون.

عەقید سەلام دەشڵێت، دەستەبەجێ تیمەکانی لێکۆڵینەوەی دەزگای ئاسایشی هەرێم گەیشتوونەتە شوێنی ڕووداوەکە و دەستیان بە لێکۆڵینەوە  کردووە، تاوەکو ئێستاش نازانرێت درۆنەکان لە کوێوە ئاراستە کراون.

لیوا ئەحمەد لەتیف، وتەبێژی هێزەکانی 70 بە میدیای فەرمی یەکێتی ڕاگەیاندووە: دوو درۆن لەلایەن هێزەکانمانەوە لە دوو شوێنی جیاوازی تاسڵوجە خرانە خوارەوە. ڕووداوەکە هیچ زیانێکی بەدواوە نەبووە و تا ئێستا نەزانراوە درۆنەکان سەر بە کێن و لە کوێ ئاراستە کراون". 

زانیاریی زیاتر: هەردوو درۆنەکە لەکاتی خستنەخوارەوەیان دەنگی بەهێزیان هەبووە، کەمتر لە 100 مەتر دوو لە ژمارەیەک ماڵ کەوتوونەتە خوارەوە، بەهۆی بەهێزی دەنگ و گەورەیی ڕووداوەکە زیان بەر چەند ماڵێک کەوتووە و جام و پەنجەرەکانیان شکاون.

باکگراوند: ئەم هێرشە لەکاتێکدایە، شەوی ڕابردوو لە ماوەی کاتژمێرێکدا بە کاتیۆشا و درۆنی بۆمبڕێژکراو هێرش کرایە سەر فڕۆکەخانەی کەرکووک، پاڵاوگەی بێجی و کەمپی دەرکاری سەر بە ئیدارەی سەربەخۆی زاخۆ، بەرپرسانی کەرکووک و دەزگا ئەمنییەکانیش پشتڕاستیان کردەوە هێرشەکە لە ناوخۆی عێراقدا کراوە، یەکێک لەوان ڕێبوار تەها، پارێزگاری کەرکووک بە ئاڤای گوت: هۆکارەکەی ئەوەیە لە ڕۆژانی ڕابردوودا ئۆپەراسیۆنێک بۆ سەر داعش کراوە، ژمارەیەک بەرپرس و چەکداری داعش دەستگیر کراون و ژمارەیەکیشیان کوژراون و گومان دەکەن هێرشەکە لەلایەن داعشەوە کرابێت.

لەلایەکی دیکەوە: سەرچاوەیەکی ئەمنی سلێمانی بە ئاڤای ڕاگەیاند، ئاسایشی سلێمانی لەگەڵ هێزە ئەمنییەکاندا لە ئۆپەرسیۆنی سەر داعش بەشدار بووە، بۆیە گومان دەکرێت ئەم هێرشەش درێژکراوەی هێرشی شەوی ڕابردوو بووبێت و هەر لەلایەن داعشەوە کرابێت.

دڵنیایی بۆ هاووڵاتیان: دەزگا ئەمنییەکانی سلێمانی بڵاوەیان بە خەڵکی ناوچەکە کردووە و داوایان لێ کردوون بگەڕێنەوە ماڵەکانیان، تەواوی خەڵکی سلێمانیش دڵنیا دەکەنەوە ڕەوشەکە ئارامە و سلێمانی لەژێر هیچ مەترسییەکدا نییە.

 ڤیدیۆی کەمێک دوای خستنەخوارەوەی یەکێک لە دۆنەکان

وردەکاری و زانیاری تەواو لەبارەی هێرشەکە لێرە بزانە