ئەمریکا بەشێک لە هاوکارییەکانی بۆ ئۆکراینا ڕاگرت

ئاڤا نیوز

ئەمریکا ناردنی ژمارەیەک کەرەستەی سەربازی بۆ ئۆکراینا ڕاگرت، لەکاتێکدا وڵاتەکە داوای هاوکاری زیاتر لە واشنتن دەکات.

ڕاگەیێنراوی فەرمی: کۆشکی سپی ڕایگەیاند، ئەمریکا ناردنی چەند جۆرە چەکێکی دیاریکراوی، لەنێویاندا مووشەکی بەرگریی ئاسمانی، بۆ ئۆکراینا هەڵپەساردووە، هۆکارەکەشی گەڕاندەوە بۆ نیگەرانیی واشنتن لە کەمبوونەوەی کۆگاکانی تەقەمەنی.

لێدوانی فەرمی: ئانا کێلی، جێگری وتەبێژی کۆشکی سپی، بە ئاژانسی فرانس پرێسی ڕاگەیاندووە، "ئەم بڕیارە بۆ ئەوە دراوە کە بەرژەوەندییەکانی ئەمریکا لە پێشینەدا بن، ئەمەش دوای پێداچوونەوەیەک دێت کە وەزارەتی بەرگری بە یارمەتییە سەربازییەکانی وڵاتەکەماندا کردوویەتی بۆ وڵاتانی دیکەی جیهان."

لەلایەکی دیکەوە: بەپێی میدیاکانی ئەمریکا، ڕاگرتنی چەک بۆ کیێڤ مووشەک و ئاڕپی جیی بەرگریی ئاسمانی دەگرێتەوە.

ئەوەی ئێستا ڕوودەدات: ئەم بڕیارە لە کاتێکدایە کە ئۆکراینا ڕووبەڕووی هێرشی ئاسمانیی چڕی ڕووسیا بووەتەوە و ژمارەی فڕۆکەی بێفڕۆکەوانە دوورمەوداکان کە ڕووسیا ئاراستەی ئۆکراینای کردوون، لە مانگی شەشدا بە ڕێژەی 36.8% بەراورد بە مانگی پێشوو بەرزبووەتەوە.