سوودانی: دەبێت هەموو لایەنەکان هاوکار بن لە چارەسەرکردنی قەیرانی ئاو

ئاڤا نیوز

محەممەد شیاع سوودانی، سەرۆکوەزیرانی عێراق دووپاتی دەکاتەوە، کێشەی کەمیی ئاو لە عێراق درێژخایەنە و جەختی کردەوە کە دەبێت هەموو لایەنە پەیوەندارەکان هاوکار بن لە ڕووبەڕووبوونەوەی ئەو قەیرانە.

 

ڕاگەیێنراوی فەرمی: بەگوێرەی نووسینگەی ڕاگەیاندنەکەی، سەرۆکوەزیرانی عێراق دووپاتی کردەوە, کەمیی ئاو کێشەیەکی درێژخایەنە و هەموو وەرزێک نوێ دەبێتەوە بەتایبەتی لە حاڵەتی کەمیی بارانبارین هاوکات سوودانی ڕوونیکردەوە کە حکومەت ڕێککەوتنێکی ستراتیژیی لەگەڵ تورکیا سەبارەت بە ئاو واژۆ کردووە بە لەبەرچاوگرتنی ئەوەی 90%ی سەرچاوە ئاوییەکانی عێراق لە تورکیاوە دێت.

 

زانیاریی زیاتر: سەرۆکوەزیرانی عێراق ئاشکرای کرد، پێنج ملیار دینار بۆ چاککردنەوەی پڕۆژەکانی ئاودێری تەرخانکراوە، هەروەها بڕی 13 ملیار دینار بۆ چاککردنەوەی بەپەلەی وێستگە و پڕۆژەکان دانراوە هاوکات سوودانی فەرمانی پێکهێنانی لیژنەیەکی تەکنیکی بەسەرۆکایەتیی سەرۆکی دەستەی ڕاوێژکاری کردووە بۆ دەستنیشانکردنی چارەسەری خێرا و دۆزینەوەی چارەسەری ستراتیژی بۆ ئەم پرسە.

 

گۆشەیەکی دیکەی دیمەنەکە: حکومەتی عێراق پرۆژەی شیرینکردنی ئاوی دەریای دەستپێکردووە لە پارێزگای بەسرە کە یەکێکە لە گەورەترین پرۆژەکانی هاوشێوە لە ناوچەکە لەپێناو چارەسەرکردنی قەیرانی کەمیی ئاو لەو وڵاتە.