بەلەمێکی گەشتیاری لە ئیندۆنیزیا ژێرئاو دەکەوێت

ئاڤا نیوز

بەلەمێکی گەشتیاری لە نزیک دوورگەی بالی لە ئیندۆنیزیا کە 65 کەسی هەڵگرتبوو نقوم دەبێت و چوار کەس گیان لەدەست دەدەن و ژمارەیەکیش تاوەکو ئێستا بێسەروشوێنن.

چیرۆکی سەرەکی: درەنگانی ڕۆژی چوارشەممە لە نزیک کەناراوەکانی دوورگەی بالی لە ئیندۆنیزیا، بەلەمێکی گەشتیاران، نقوم بوو و تاوەکو ئێستا ئاژانسی نیشتمانی گەڕان و ڕزگارکردن بەردەوامن لە گەڕان بۆ دۆزینەوەی کەسانی بێ سەرشوێن.

زانیاریی بەدەستهاتوو: پۆلیسی شارۆچکەی بانیووانگی بە میدیا ناوخۆییەکانی ڕاگەیاند، "بەلەمەکە لە شاری بانیووانگی دوورگەی جاڤا، بەرەو دوورگەی بالی دەچوو، بەڵام پاش 25 خوولەک لەبەر خراپیی کەش و بەرزیی شەپۆلەکانی دەریا نقوم بوو.

ژمارەکان وادەڵێن: بە گوێرەی زانیارییەکانی بەپرسان، بەلەمەکە 65 کەسی هەڵگرتبوو، تاوەکو ئێستا چوار کەس گیانیان لەدەستداوە و تەرمەکانیان دۆزراوەتەوە، لە چوارچێوەی ئۆپەراسیۆنی ڕزگارکردنیش 23 کەس ڕزگار کراون، بەڵام هێشتا چارەنووسی 38 سەرنشینی دیکە نادیارە.

هۆکارە زانراوەکان: دەسەڵاتدارانی ئیندۆنیزیا هۆکاری ڕووداوەکەیان بۆ خراپی کەش و هەوا گەڕاندەوە، بەڵام لێکۆڵینەوەکان ‌هێشتان بەردەوامن.