ئاگادارییەک لە کۆمیسیۆنەوە بۆ داواکارانی کارمەندی سەر سندووقەکانی دەنگدان

ئاڤا نیوز

کۆمیسیۆنی باڵای هەڵبژاردنەکانی عێراق ئاگاداری سەرجەم ئەو کەسانە دەکاتەوە کە داواکارییان بۆ کارکردن وەک فەرمانبەری بنکەکانی دەنگدان پێشکەش کردووە.

وێنە گەورەکە: بڕیارە ڕۆژی 11ی مانگی 11ی ئەمساڵ هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت، کۆمیسیۆنیش بەردوامە لە ڕێکارەکانی بۆ سەرپەرشتیکردنی پرۆسەکە.

بڵاوکراوەی فەرمی: بەگوێری ئاگادارینامەیەکی کۆمیسیۆنی باڵای هەڵبژاردنەکانی عێراق لە چوارچێوەی ڕێکخستنی پرۆسەی وەرگرتنی فەرمانبەرانی ڕۆژی دەنگدان، بۆ مسۆگەرکردنی بەشداریکردنی هەموو لایەک، پێویستە ئەوانەی داواکارییان پێشکەش کردووە پابەندی ئەم هەنگاوانەی خوارەوە بن:

هەنگاوی یەکەم: هەموو ئەو کەسانەی کە بە شێوەی ئەلیکترۆنی فۆرمیان پڕکردووەتەوە، دەبێت دوو کۆپیی کاغەز لە فۆرمی داواکارییەکەیان ڕابکێشن (چاپ بکەن).

هەنگاوی دووەم: پێویستە بە شێوەی کەسی (بە دەستی) سەردانی بنکەی تۆمارکردن بکەن و هەردوو کۆپییە چاپکراوەکە ڕادەست بکەن.

لە هەمان کاتدا: کۆمیسیۆنی بە پێویستی دەزانێت ئەم ڕێکارانە دەبێت پێش کۆتاییهاتنی وادەی فەرمیی پێشکەشکردنی داواکاری ئەنجام بدرێت و هەر داواکارێک کە فۆرمەکەی بە شێوەی کاغەز و لە کاتی دیاریکراودا ڕادەست نەکات، ناوی لە تیروپشکی ئەلیکترۆنی دەردەهێنرێت و مافی بەشداریکردنی نامێنێت.

ئەوەی پێویستە بیزانیت: بۆ هەڵبژاردنەکەی مانگی 11ی ئەمساڵ کۆمیسیۆن پێویستی بە 250 هەزار کارمەندی سەر سندووقە، تائێستاش زیاتر لە 550 هەزار کەس لە کارمەندانی حکومەت و دەرچووانی دانەمەزراو داواکارییان پێشکەش کردووە، لەسەر بنەمای مەرجەکانیش کۆمیسیۆن دوای 9ی تەمموز، بەشێوەی تیروپشک ناوی وەرگیراوان ڕادەگەیێنێت.