محەممەد حەسسان لەگەڵ سەرۆک بارزانی و سەرۆکی هەرێم و سەرۆکوەزیرانی کوردستان کۆبووەوە

ئاڤا نیوز

 

ئەمڕۆ پێنجشەممە نوێنەری تایبەتی سكرتێری گشتیی نەتەوەیەكگرتووەكان بۆ عێراق لەگەڵ هەریەک لە سەرۆک بارزانی، نێچیرڤان بارزانی، سەرۆکی هەرێمی کوردستان و سەرۆکوەزیران مەسرور بارزانی کۆبووەوە، لە کۆبوونەوەکان جەخت کرایەوە لە هەماهەنگی و لێکتێگەیشتن لەنێوان حکومەتی فیدڕاڵی و هەرێمی کوردستان بۆ چارەسەرکردنی کێشەکانی نێوانیان. 

 

ئەوەی پێویستە بیزانیت: سەرۆک بارزانی و د. محەممەد حەسسان لە کۆبوونەوەی نێوانیان تاوتووێی گۆڕانکارییە ناوچەییەکانیان کرد و جەخت لە باشترکردنی پەیوەندییەكانی نێوان هەولێر و بەغدا و دیالۆگی نێوان هەردوولا بۆ گەیشتن بە چارەسەر کرا، جیا لەوەش باسی كار و چالاكییەكانی یونامی لە عێراق و هەرێمی كوردستان تەوەرێکی دیکەی ئەو دیدارە بوو.

لەلایەکی دیکە: لەو کۆبوونەوەیەی ئەمڕۆ لە هەولێر کرا، نێچیرڤان بارزانی، سەرۆکی هەرێمی کوردستان و نوێنەری تایبەتی سكرتێری گشتیی نەتەوەیەكگرتووەكان بۆ عێراق، دۆخی سیاسی گشتیی عێراق و هه‌رێمى كوردستان و هاريكارى و هه‌ماهه‌نگيى نێوان يوونامى و لايه‌نه‌ په‌يوه‌نديداره‌كان له‌ عێراق و هه‌رێمى كوردستان تاوتوێ کرا، هه‌ردوولا چاره‌سه‌ركردنى كێشه‌كانى هه‌ولێر  و به‌غدا و لێكتێگه‌يشتنى نێوانيان به‌پێويست زانى كه‌ له‌ به‌رژه‌وه‌نديى ته‌واوى عێراقدايه. لای خۆشیەوە د. ئه‌لحه‌سسان جه‌ختى له‌ گرنگيى پاراستنى عێراق له‌ كێشه‌كانى ناوچه‌كه‌ كرده‌وه‌.

زانیاریی زیاتر: جیا لەدیدار و کۆبوونەوە لەگەڵ سەرۆک بارزانی و سەرۆکی هەرێمی کوردستان، د. محەممەد حەسسان لەگەڵ سەرۆکوەزیران مەسرور بارزانی کۆبووەوە، گفتوگۆکان لەبارەی دوایین پێشهات و پەرەسەندنەکانی دۆخی گشتیی عێراق و ناوچەکە بوون، تەوەری سەرەکی کۆبوونەوەکەش تایبەت بوو بە ڕێزگرتن لە سیستمی فیدراڵیی عێراق و قەوارەی دەستووریی هەرێمی کوردستان و ماف و شایستە داراییەکانی خەڵکی کوردستان. هاوکات دوای دیدارەکە سەرۆکوەزیران گوتی، "لە کۆبوونەوەکەدا جەختمان لە چارەسەرکردنی کێشەکانی نێوان هەرێمی کوردستان و حکومەتی فیدراڵ لەسەر بنەمای دەستوور کردەوە."