ترەمپ: بە ئیرانم گوت فەرموون مووشەکەکانتان بتەقێنن

ئاڤا نیوز

دۆناڵد ترەمپ، سەرۆکی ئەمریکا، سەبارەت بە هێرشە مووشەکییەکەی ئێران لە 23-6-2025 بۆ سەر بنکەی سەربازیی ئەمریکا لە قەتەر، ڕایگەیاند: پێش هێرشەکە ئێران ئاگاداری داوەتەوە ئەمریکا کە لە وەڵامی هێرشەکانی سەر وێستگە ئەتۆمییەکانی ئەو هێرشە ئەنجام دەدات و بە دیاریکراویش کاتی هێرشەکەیان بە ئەمریکا گوتبوو. 

 

وێنە گەورەکە: بەر لەوەی ئاگربەستی نێوان ئێران و ئیسرائیل بێتە ئاراوە، ئەمریکا بە ژمارەیەک مووشەک و بۆمب هێرشی کردە سەر سێ وێستگەی ئەتۆمی ئێران و دواتر سەرۆکی ئەمریکا ڕایگەیاند: کۆتاییمان بە بەرنامە ئەتۆمییەکەی ئێران هێناوە و وێستگەکان لەناوچوون، دواتر ئێران کاردانەوەی هەبوو و بە ژمارەیەک مووشەک هێرشی کردە سەر بنکەیەکی سەربازی هێزەکانی ئەمریکا لە قەتەر. 

لێدوانی فەرمی: ترەمپ گوتی "پەیوەندیان پێمەوە کرد بۆ ئەوەی پێم بڵێن دەبێت تەقەمان لێ بکەن. ئەمە ئێران بوو، زۆر ڕێزدار. ئەمە واتە ڕێزمان لێ دەگرن. لەبەرئەوەی ئێمە 14 بۆمبمان بەرسەردا باراندن، گوتیان 'ئێمە حەز دەکەین 14 تەقەتان لێ بکەین.' منیش گوتم فەرموون، تێدەگەم."

زانیاریی زیاتر: سەرۆکی ئەمریکا گوتیشی "ئەوان وتیان کوێ مووشەکباران بکەن. من گوتم، باشە. ئێمە قەڵایەکمان چۆڵ کردووە. بنکەیەکی سەربازیی جوان لە قەتەر. ئەوان گوتیان 'بەڕێز، یەک کاتژمێر کاتمان دەوێت'. منیش گوتم باشە. دەتوانن بیهێننە پێشچاوی خۆتان؟ ئەوان تەواو میهرەبان بوون، ئەمە ئێرانە کە پەیوەندیم پێوە دەکات و دەڵێت: دەیەوێت چواردە جار تەقەمان لێ بکات. من گوتم فەرموون، دەستپێبکەن. ئەوان چواردە مووشەکی پێشکەوتووی زۆر خێرایان نارد و هەمووشیان خرانە خوارەوە."

لەلایەکی دیکەوە: ترەمپ گوتیشی، بە هۆی هێرشەکانی ئەمریکاوە بەرنامە ئەتۆمییەکەی ئێران لەناو چووە و ئێستا زۆر دەیەوێت لەگەڵ ئەمریکا دانوستان بکات.