پسپۆڕێکی ژینگە: لەماوەی دوو مانگدا 45 ڕۆژ کەشوهەوا تۆز و خۆڵ بووە

ئاڤا نیوز

پسپۆڕێکی ژینگە دەڵێت، ئەمساڵ زۆرترین دیاردەی خۆڵبارین و بەرزبوونەوەی تۆز ڕوویداوە بەراورد بە ساڵانی ڕابردوو، ئەمەش لێکەوتەی کەمبارانی ئەمساڵە.

وێنە گەورەکە: بەپێی قسەی پسپۆڕانی بوارەکە، زستانی ئەم ساڵ ڕێژەیەکی کەمی باران باریووە، ئەمەش بووەتە هۆکاری زۆربوونی دیاردەی خۆڵبارین و بەرزبوونەوەی تۆز لە بەشێکی پارێزگاکانی هەرێمی کوردستان بە تایبەت لە هەولێر.

لێدوانی فەرمی: د.ڕێبەر مزوری، پسپۆڕی ژینگە و مامۆستای زانکۆ بە ئاڤا میدیای وت، نەخشەی مانگە دەستکردەکان دەریدەخات، لە شاری هەولێر لە کۆی 65 ڕۆژ واتا لە 2025-05-01 تاوەکو ئێستا، زیاتر لە 45 ڕۆژ تۆز و خۆڵ هەبووە، ئەمەش بەراورد بە ساڵانی ڕابردوو ژمارەیەکی زۆر بەرزە و لێکەوتەی خراپی لەسەر ژینگە هەیە، تەنیا یەک سوودی هەیە ئەویش تاڕادەیەک پلەی گەرمی دادەبەزێنێت، ئەو ڕۆژانەشی تۆز و خۆڵ نەبووە، بەو مانایە نییە کە ژینگە پاک بووبێتەوە، بەڵکو ڕێژەی تۆز و خۆڵەکە کەم بووە.

زانیاریی زیاتر: بە گوتەی پسپۆڕەکەی ژینگە، ئەمساڵ نەتەوەیەکگرتوەکان ئامارێکی لەبارەی تێکچوونی ژینگەی عێراق بڵاوکردەوەتەوە، لە ئامارەکە هاتووە، تا ساڵی 2030 لەماوەی پێنج ساڵی ئایندە، لە کۆی 365 ڕۆژی ساڵ، 270 ڕۆژی دەبێتە خۆڵبارین.