ئاڤا زانياریی نوێ لەبارەی كوشتنی شۆفێرێكی تاكسی لە هەولێر بڵاو دەکاتەوە

ئاڤا نیوز

شەوی ڕابردوو شۆفێرێكی تاكسی لە شاری هەولێر بە چەقۆ لەلایەن سەرنشینێكەوە کە بە ڕەچەڵەک سوورییە بە سەختی بریندار دەكرێت، بەهۆی كاریگەریی برینەكەی گیان لەدەستدەدات.

چیرۆكی سەرەكی: هاووڵاتیەك بە ناوی (فەرهاد سەلیم) سەرقاڵی پیشەی ڕۆژانەی خۆی بووە كە شۆفێری تاكسییە، كەسێك هەڵدەگرێت، لە ڕێگە لەلایەن ئەو سەرنشینەوە كە بەپێی زانیارییەكانی پۆلیس، بە ڕەچەڵەک سوورییە، پێنج چەقۆی لێ دەدرێت و بەهۆی كاریگەربوونی بە سەختیی برینەكەی، گیان لەدەستدەدات.

لێدوانی فەرمی: برای كوژراوەكە بۆ ئاڤا قسەی كرد و ڕایگەیاند، براكەی كێشەی كۆمەڵایەتی و كەسی لەگەڵ هیچ كەسدا نەبووە و بەشێوەیەكی ئاسایی سەرقاڵی كاری ڕۆژانەی بووە، بەڵام لەلایەن سەرنشینێك كوژراوە و زانیاریمان هەیە پۆلیس بكوژەكەی دەستگیر كردووە و لێكۆڵینەوە لە ڕووداوەكە دەستیپێكردووە.

زانیاریی بەدەستهاتوو: كوژراو كە لەنێو خەڵكی بە فەرهاد برادۆستی ناسراوە، تەمەنی 41 ساڵە و خێزاندارە و خاوەنی پێنج منداڵە، شەوی ڕابردوو سەرنشینێكی بە ڕەچەڵەک سووری لەلای پاركی سامی عەبدولڕەحمانی شاری هەولێر هەڵگرتووە و، لەلایەن ئەو كەسەوە بە چەقۆ كوژراوە، دوای ئاگادارکردنەوەی پۆلیسی هەولێر بە ڕووداوەکە، لێکۆڵینەوە دەستپێكردووە و توانراوە ناسنامەی بكوژەكە بدۆزنەوە و ئەمڕۆ بەیانی دەستگیری بكەن.