نەسر داوای چاکسازیی لە سیستمی هەڵبژاردن و بێبەشکردنی "گەندەڵکاران" تێیدا دەکات

ئاڤا نیوز

هاوپەیمانی نەسر دەڵێت، بنەمای هێزی دەوڵەت لە سیستمە سیاسییەکەی دایە ئەویش ڕەنگدانەوەی ئیرادەی خەڵکە، بۆیەش بۆ بەهێزکردنی دەوڵەت دەبێت چاکسازیی لە سیستمی هەڵبژاردن بکرێت و "گەندەڵکارانیش" لە خۆ کاندیدکردن بێبەش بکرێن.

وێنە گەورەکە: 28ـی حوزەیران هاوپەیمانی نەسر کە حەیدەر عەبادی، سەرۆکوەزیرانی پێشووتری عێراق سەرۆکایەتی دەکات، ڕایگەیاند، بەشداریی لە هەڵبژاردنی پەرلەمانی عێراقدا ناکات و تەنیا پشتیووانی بەشێک لە کاندیدانی هاوپەیمانی "هێزەکانی دەوڵەت" دەکات.

ڕاگەیێنراوی فەرمی: هاوپەیمانی نەسر ئەمڕۆ هەینیی لە ڕاگەیێنراوێکدا ئاماژەی بەوەكردووە، ئەوان پێشوازیی لە بەشداریکردنی فراوانی لایەنەکان لە هەڵبژاردنی پەرلەماندا دەکەن کە دەبێتەهۆی پتەوکردنی شەرعییەتی سیستمی سیاسیی و نوێنەرایەتی ڕاستەقینەی گەل، بەڵام لەگەڵ ئەوەشدا دەبێت متمانە بە پڕۆسەکە زیاتر بکرێت ئەویش بە چاکسازیی لە سیستمی هەڵبژاردندا دەکرێت.

زانیاریی زیاتر: هاوپەیمانی نەسر باوەڕی وایە هەر سیستمێک بایکۆتی تێدابێت مانای وایە سیستمەکە هەڕەشەی نەمانی لەسەرە، بۆیە بەشداری فراوانی هەمووان لە پڕۆسەی سیاسی مانای پتەوی سیستمە سیاسییەکەیە، ئەوەش بە چاکسازیی پڕۆسەی هەڵبژاردن و دوورخستنەوەی گەندەڵکاران و ئەوانە دەکرێت کە بەڕێگای جۆربەجۆر یاریی بە ئەنجامەکانی هەڵبژاردن دەکەن.