لە سۆران شوشتنگەکان ناچار دەکرێن سیستمی ڕیسایکلین بەکاربهێنن

ئاڤا نیوز

لە ئیدارەی سەربەخۆی سۆران بڕیار دەرچووە، هەموو شوشتنگەکان پێویستە سیستمی دووبارە بەکارهێنانەوە (ڕیسایکلین) بۆ ئەو ئاوە دابنێن کە لە شوشتنی ئۆتۆمبێل بەکاری دەهێنن.

وێنە گەورەکە: ماوەی چەند ساڵێکە ئاستی ئاوی ژێر زەوی لە بەشێکی زۆری پارێزگاکانی هەرێمی کوردستان دابەزیووە، چەندین ڕێکار گیراوەتەبەر لەوانە، شوشتنگەکان ناچار دەکرێن لەبری ئەوەی ئاوی شیرین بۆ شوشتنی ئۆتۆمبێل بەکاربهێنن، ئاوی دووبارە پاڵفتەکراو بەکاربهێنن.

لێدوانی فەرمی: ئەندازیار یوسف ئەحمەد، بەڕێوەبەری ئاوی سۆران بە ئاڤا میدیای ڕاگەیاند: بەپێی ڕێنمایی دەبێ هەموو شوشتنگەکان ئاوی ڕیسایکلین بەکاربهێنن، ئەو ئاوەی بەکاریدەهێنن لەبری ئەوەی بچێتە ناو ئاوەڕۆ پێویستە دووبارە بەکاربێتەوە و ئامێرێکی تایبەت بە پاڵاوتنی ئاوی بەکارهاتوو دابنێن.

زانیاریی زیاتر: بەوتەی بەڕێوەبەری ئاوی سۆران، لیژنەکە دوو هەفتەیە دەستبەکاربووە، لەسەر شوشتنگەکان بووەتە مەرج، لەکاتی نوێکردنەوەی مۆڵەتی ساڵانە بۆیان نوێ ناکرێتەوە، ئەمە جگە لەوەی لە هیچ فەرمانگەیەک مامەڵەیان بۆ ڕایی ناکرێت هەتا ئەو سیستمە دانەنێن.

ژمارەکان وادەڵێن: لە سنووری ئیدارەی سەربەخۆی سۆران، 25 شوشتنگە هەیە، تا ئێستا یەک شوشتنگە لە سۆران ئەو سیستمە بەکاردەهێنێت.

باکگراوند: لە ساڵی 2022ـەوە ڕێنمایی تایبەت بە شوشتنگەکان بۆ سەرجەم پارێزگاکانی هەرێمی کوردستان دەرچووە، بەپێی بڕگەی 4 لە یاسای ژمارە 4ـی پاراستنی ئاو و ئاوەڕۆ، دەبێت شوشتنگەکان فلتەریان هەبێت.