پاسەوانی سنوور لەبارەی لابردنی ساترەکانی نێوان عێراق و سووریا ڕوونکردنەوە دەدات

ئاڤا نیوز

فەرماندەیی پاسەوانی سنوور، ئەو دەنگۆیانەی ڕەتدەکاتەوە کە گوایە شۆفڵی سووری ساترەکانی نێوان عێراق و سووریایان لابردبێت.

چیرۆکی سەرەکی: هەندێک پەیجی تۆڕە کۆمەڵایەتییەکان گرتەیەکی ڤیدیۆییان بڵاوکردووەتەوە کە تێیدا بانگەشەی ئەوە دەکەن شۆفڵی سووری ساترەکانی نێوان عێراق و سووریایان لابردووە.

 

ڕاگەیێنراوی فەرمی: بەگوێرەی ڕاگەیێنراوی فەرماندەییەکە، "ئەو گرتە ڤیدیۆیە پەیوەندی بە لابردنی ساترێک لەناو خاکی سووریاوە هەیە لە پارێزگای حەلەب و هیچ پەیوەندییەکی بە سنووری نێوان عێراق و سوریاوە نییە."

لە هەمان کاتدا: پاسەوانی جەخت لەوە دەکاتەوە، "سنووری نێوان عێراق و سووریا سەقامگیرییەکی ئەمنی بەخۆیەوە دەبینێت و قەڵغانی پتەو و سیستەمێکی چاودێریی پێشکەوتووی هەیە، جگە لەوەی بە درێژایی 24 کاتژمێر لەلایەن هێزەکانمانەوە چاودێری دەکرێت."

داواکاریی فەرمی: فەرماندەییەکە داوا لە دەزگاکانی ڕاگەیاندن و بەکارهێنەرانی تۆڕەکۆمەڵایەتییەکان دەکات، "وردی و دروستی لە گواستنەوەی هەواڵدا لەبەرچاو بگرن و پشت بە سەرچاوە فەرمییەکان ببەستن." هاوکات هۆشداریشی دا لە "گرتنەبەری ڕێکاری یاسایی بەرامبەر هەر کەسێک کە پڕوپاگەندە و زانیاریی چەواشەکارانە بڵاودەکاتەوە، بەپێی یاسا کارپێکراوەکان."