تورکیا بەشداری لە کوژاندنەوەی ئاگری لازقیە دەکات

ئاڤا نیوز

وەزیری فریاکەوتنی سووریا ڕایدەگەیێنێت، لەگەڵ تورکیا ڕێککەوتووین بۆ بەشداریکردن لە کوژاندنەوەی ئاگرەکانی گوندەوارەکانی لازقیە.

 

چیرۆکی سەرەکی: چەند ڕۆژێکە ئاگر لە چەند ناوچەیەکی سووریا کەوتووەتەوە، بە تایبەت لە ناوچەکانی نزیک کەناراوەکانی پارێزگای لازقیە، بەهۆی بوونی مین و تەقەمەنی و هاوکات بای بەهێزەوە، تیمەکانی ئاگرکوژێنەوە لە کۆنترۆڵکردنی ئاگرەکە ڕووبەڕووی گرفت بوونەتەوە ناتوانن ئاگرەکە کۆنترۆڵ بکەن.

 

لێدوانی فەرمی: ڕائد ساڵح، وەزیری فریاکەوتن و بەڕێوەبردنی کارەساتەکانی سووریا، بە ئاژانسی فەرمی سووریای ڕایگەیاند، کۆبوونەوەیەکی مەیدانیی لەگەڵ لایەنی تورکی لە ناوچەی سنووریی "یەيلا داغ"ی دراوسێی چیای تورکمان ئەنجامداوە، ڕێککەوتن کراوە لەسەر بەشداریکردنی دوو فڕۆکەی هێلیکۆپتەری ئاگرکوژێنەوە لە بەیانیی ئەمڕۆوە (شەممە)ـەوە، هاوکات 11 ئۆتۆمبێل و ئامێر (8 ئۆتۆمبێلی ئاگرکوژێنەوە و 3 تانکەری دابینکردنی ئاو) چوونەتە ناوچەکەوە بۆ بەشداریکردن لە ئۆپەراسیۆنەکانی کوژاندنەوەدا.

 

لە هەمان کاتدا: بە گوتەی ساڵح، ئەم هەماهەنگییە بە هاوکاریی نێوان وەزارەتی فریاکەوتن و بەڕێوەبردنی کارەساتەکان و وەزارەتی دەرەوەی سووریا لەگەڵ لایەنی تورکی ئەنجام دەدرێت، ئەمەش بۆ گەرەنتیکردنی ئامادەباشی و ئاڵوگۆڕکردنی زانیاریی مەیدانی و بەهێزکردنی وەڵامدانەوەی خێرایە.

 

ئەوەی پێویستە بیزانیت: تیمەکانی ئاگرکوژێنەوە و فریاکەوتن و بەرگریی شارستانی لە وەزارەت و پارێزگا جیاوازەکانەوە بەردەوامن لە هەوڵەکان بۆ کۆنترۆڵکردنی ئەو ئاگرانەی کە پانتاییەکی بەرفراوانی لە گوندەوارەکانی باکووری لازقیە گرتووەتەوە و بۆ ڕێگریکردن لە گەیشتنیان بە ناوچە و گوندی نوێ.