ئەنجوومەنی ئاسایشی کوردستان: لایەنی ناوخۆیی و دەرەكی دەستیان لە پشێوییەكانی خەبات و لاجان هەبووە

ئاڤا نیوز

 

ئەنجوومەنی ئاسایشی هەرێمی کوردستان دانبێپدانانی نێچیروان عیسا، بەرپرسی کۆمیتەی یەکێتیی نیشتمانیی کوردستان لە قەزای خەبات بڵاو کردەوە. ئەنجوومەنی ئاسایش هەرێمی كوردستان دەڵێت، چەند لایەنێكی ناوخۆیی و دەرەكی دەستیان لە پشێوییەكان هەبووە كە درێژكراوەی زنجیرەیەك پیلانی تێكدەرانەیە، ماوەیەكە دژی هەرێمی كوردستان نەخشەی بۆ كێشراوە.

 

وێنە گەورەکە: ڕۆژی شەممە 29ـی تشرینی دووەم، گرژی و ئاڵۆزی لەسەر ڕێگەی گوێڕ- هەولێر لە نزیك گوندی لاجان دروستبوو، كۆمەڵە کەسێک رێگای تانکەرەکانی گواستنەوەی سووتەمەنی و هاووڵاتیانیان لە سنووری گوێڕ گرت و تەقەیان بەسەر خەڵک و ڕێبوارانی ئەو ڕێگایەدا کرد، لە ئەنجامی تەقەی ئەو کەسانەدا دوو کەس و گیانیان لە دەست دا و ژمارەیەک کەسی تریش بریندار بوون.

 

لێدوانی فەرمی: نێچیروان عیسا، بەرپرسی کۆمیتەی یەکێتی و تۆمەتباری ڕووداوەکەی قەزای خەبات و لاجان لەکاتی دانپێدانان کە ئەنجوومەنی ئاسایشی کوردستان بڵاوی کرەوە، دەڵێت: 'جەوهەر ئاغا' پێی وتم تەنسیقمان لەگەڵ کەتائیب سەیدولشوهەدا کردووە.

 

دەشڵێت، "بەرپرسێکی حەشدی شەعبی پێی وتم 135 کەسم دەوێت تاوەکو ڕاهێنانیانیان پێ بکەین لە کەتائیبی سەیدولشوهەدا. ڕاهێنانی ئەو کەسانە بۆ هەواڵگریی کەتائیبی سەیدولشوهەدا و دروستکردنی گرژی بووە لە سنووری هەولێر." 

 

دەقی ڕاگەیێنراوێك لە ئەنجوومەنی ئاسایشی هەرێمی كوردستانەوە لەسەر ڕووداوەكانی لاجان:

دامەزراوەكانی ئەنجوومەنی ئاسایشی هەرێمی كوردستان، لە ئان و ساتی پشێوی و ئاڵۆزییەكانی گوندی لاجانی سەر بە قەزای خەبات، دەستبەجێ بەدواداچوون و لێكۆڵینەوەیان دەستپێكرد و گەیشتنە ئەو ئەنجامەی لایەنی ناوخۆیی و دەرەكی دەستیان لەو پشێویە  هەبووە كە درێژكراوەی زنجیرەیەك پیلانی تێكدەرانە بووە لەماوەی ڕابردوودا نەخشەیان بۆ كێشراوە و ئامادەسازییان بۆ كراوە، ئەوانیش:

- لێدان لە كێڵگەی گازی كۆرمۆر تا بەهۆیەوە كارەبای بەرهەمهاتوو بوەستێت.

- هێرشكردنە سەر پاڵاوگەكانی نەوت و وێستگەكانی كارەبا، ئەنجامدانی تەقینەوە لە سنووری پارێزگاكانی هەولێر و دهۆك، سوودوەرگرتن لە میدیای لایەنی سیاسیی ئۆپۆزسیۆن و میدیای دەرەكی تا خەڵك دژی حكومەت هانبدەن و پشێوی بنێنەوە و لەو ڕێگەیەوە تەقە بكەن بەو ئاواتەی هێزە ئەمنییەكان وەڵام بدەنەوە و خەڵك بكوژرێت، پاشان دژی دەسەڵات پڕوپاگەندە بكەن. دواتر داوای دەستوەردان لە میلیشیاكان بكەن تاكو پەلاماری كوردستان بدەن. بەڵام هەرزوو پیلانەكانیان بۆ دامەزراوەكانمان ئاشكرا بوو، توانرا ڕێگرییان لێ بكرێت و ژمارەیەك تێكدەریش كە ڕاستەوخۆ بەشداربوون لەو ئاژاوەگێڕییە، دەستنیشانكران و دەستگیركران كە بۆ جێبەجێكردنی ئەو پیلانانە فەرمانیان لە چەند لایەنێكی ناوخۆیی و دەرەكی و گرووپە میلیشیاییەكان وەرگرتووە بۆ تێكدان و ئاسایش و سەقامگیریی كوردستان.

 

لێرەشەوە هەموو لایەك ئاگادار دەكەینەوە، ئاژاوەگێڕان ڕووبەڕووی یاسا دەكرێنەوە و بەگوێرەی یاسا بەركارەكان بە سزای یاسایی خۆیان دەگەیێندرێن.