کۆمیسیۆن: هیچ بڕیارێک نییە بۆ گۆڕانکاری لە ناوی کاندیدان

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق ئەو دەنگۆیانە ڕەتدەکاتەوە کە لەبارەی دووبارە کردنەوەی دەرگای گۆڕانکاری لە ناوی کاندیدان دەکرێن.

 

چیرۆکی سەرەکی: ئەمڕۆ شەممە لە چەند پەیجێک هەواڵێک بەناوی سەرچاوەیەک لە کۆمیسیۆنی باڵای هەڵبژاردنەکانی عێراقەوە بڵاوکرایەوە، کە بانگەشەی ئەوەی دەکرد "دەرگای گۆڕانکاری و گۆڕینی کاندیدان تەنیا بۆ ماوەی 48 کاتژمێر دەکرێتەوە".

 

لێدوانی فەرمی: عیماد جەمیل، سەرۆکی تیمی ڕاگەیاندنی کۆمیسیۆنی هەڵبژاردنەکان، بە ئاژانسی هەواڵی عێراقی ڕاگەیاند: "کۆمیسیۆن پڕۆسەی وەرگرتنی لیستی کاندیدانی کۆتایی پێهێناوە و تا ئێستا هیچ بڕیارێک نییە بۆ دووبارە کردنەوەی دەرگای هەموارکردنەکان یان وەرگرتنی لیستی نوێ."

 

لە هەمان کاتدا: ئاماژەی بەوەشکرد: "قسەکردن لەسەر دووبارە کردنەوەی دەرگای خۆپاڵاوتن لە کاتی ئێستا هیچ بنەمایەکی ڕاستی نییە، چونکە کۆمیسیۆن بەپێی خشتەیەکی کارکردن کارەکانی و ئامادەکارییەکانی بۆ هەڵبژاردنەکانی داهاتوو ڕێکدەخات."

 

ئەوەی ئێستا ڕوودەدات: بە گوتەی عیماد جەمیل، "کۆمیسیۆن ئێستا گەیشتووەتە قۆناغی وردبینیکردنی لیستی کاندیدان، ناردنیان بۆ لایەنە پەیوەندیدارەکان، ئەنجامدانی پڕۆسەی پەسەندکردنی ئەم لیستانە و ئەنجامدانی تیروپشک بۆ پێدانی ژمارە بە قەوارەکان."

 

ئەوەی پێویستە بیزانیت: بڕیارە ڕۆژی 2025-11-11، هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت و ئامادەکارییەکانی لەلایەن کۆمیسیۆنی باڵای هەڵبژاردنەکانەوە بەردەوامە.