هۆشدارییەک لە شێخ داراوە: پلەکانی گەرما دەگەنە 50 پلەی سیلیزی

ئاڤا نیوز

پێشبینی دەکرێت شەپۆلێکی گەرمای بەتین ڕوو لە هەرێمی کوردستان بکات و لە هەندێ ناوچە پلەی گەرما بگاتە 50 پلەی سیلیزی.

چیرۆکی سەرەکی: لە چەند ڕۆژی رابردوو پلەکانی گەرما لە هەرێمی کوردستان و عێراق نزم بوونەوە، بەڵام بەپێی پێشبینییەکان لە دوای ڕۆژ سێشەممە 8/7/2025 پلەی گەرما بەرز دەبنەوە و گەرمایەکی بەتین ڕوو لە عێراق و ناوچەکە دەکات.

لێدوانی فەرمی: شێخ دارا، شارەزا و پێشکەشکاری کەشوهەوای ئاڤا لە گەشتی هەواڵەکانی کاتژمێر 12:00 ڕایگەیاند:  دابەزینی پلەی گەرما لە ڕۆژانی ڕابردوو بەهۆی ئەو شەپۆلە سیبیرییە بوو کە ڕووی لە ناوچەکە کردبوو، بەڵام کاریگەرییەکەی لە دوو ڕۆژی داهاتوو نامێنێت و پلەی گەرما بەرز دەبێتەوە.

ئەوەی پێشبینی دەکرێت بەگوتەی شێخ دارا لە ڕۆژی سێشەممەوە بەشێوەیەکی نامۆ پلەکانی گەرما بەرز دەبنەوە و ئەگەر هەیە ئەمساڵ لە هەرێمی کوردستان پلەکانی گەرما 46 و 47 تۆمار بکرێن، لە گەرمیانیش بگەنە 48 بۆ 50 پلەی سیلیزی بە تایبەت لە مانگی ئابدا.

شێخ دارا دەڵێت، بەهۆی گۆڕانی ئاڕاستەی 'با' بە خێرایی 25 بۆ 35 کیلۆمەتر لە کاتژمیرێکدا بە ئاراستەی باکووری ڕۆژهەڵات، کاریگەری خۆڵبارین لەسەر هەرێمی کوردستان کەم دەبێتەوە.