هەر کەسێک زبڵ و پاشماوە لەسەر شەقام و ڕێگای سەرەکی فڕێبدات سزا دەدرێت

ئاڤا نیوز

شارەوانی هەولێر ئاگاداری ئەو کەسانە دەکاتەوە کە زبڵ و پاشماوە فڕێ دەدەن و هۆشدارییان پێدەدات، سزای ئەو کەسانەش دەدرێت کە سەرپێچی دەکەن.

چیرۆکی سەرەکی: لە چەند ڕۆژی ڕابردوو ژمارەیەک بارهەڵگر لە شوێنی قەدەغەکراو، هەڵسان بە فرێدانی پاشماوەی خانووبەرە، تیمەکانی بەڕێوەبەرایەتیی خزمەتگوزاری و ژینگەپارێزی بارهەڵگرەکانی دەستنیشانکرد و لێکۆڵینەوەی لەگەڵ کردن.

لێدوانی فەرمی: ژیار جەلال، بەڕێوەبەری خزمەتگوزاری لە وەزارەتی شارەوانی، بە ئاڤا میدیای ڕاگەیاند، دوو بارهەڵگر زبڵ و پاشماوەیان لە شوێنی قەدەغەکراو فڕێ داوە و ژینگەیان پیسکردووە، لە بەرامبەر کارە سەرپێچیەکانیان بۆ ماوەی دوو ڕۆژ دوو گۆرەپانی گەورەی گەرەکی نیشتیمان و گەلاوێژ یان پێ پاککراوەتەوە، وەکو سزایەک بۆ ئەو سەرپێچیەی کە کردوویانە.

زانیاریی زیاتر: پێشتریش پارێزگاری هەولێر، ڕایگەیاندبوو، هەر کەسێک زبڵ و پاشماوە لە شوێنە گشتییەکان فڕێبدات و ببێتە هۆی پیسبوونی ژینگە سزا دەدرێت.

لەلایەکی دیکەوە: شارەوانی بەردەڕەش سزایەکی نوێی دەرکردووە، هەر بارهەڵگرێک پاشماوەی خانوو لەو شوێنانەی بۆیان دیاریکراوە فڕێ نەدات، بڕی 500 هەزار دینار سزای پێبژاردنی بۆ دەکرێت.