گۆڕانکاری لەکاتی سەردانی بەندکراوانی چاکسازی هەولێر دەکرێت

ئاڤا نیوز

 

بەرێوەبەرایەتیی چاکسازی گەورانی هەولێر گۆڕانکاری لە کاتی سەردانیکردنی کەسوکاری بەندکراوان دەکات و بەڕێوەبەری گشتیی چاکسازییەکانی هەرێمی کوردستانیش ئاماری ئەنجامدانی 'ژوانی هاوسەری' بۆ ئاڤا ئاشکرا دەکات. 

 

ڕاگەیێنراوی فەرمی: بەڕێوەبەرایەتیی چاکسازی گەورانی هەولێر ڕایگەیاند: لەبەر بەرژەوەندی گشتی و داواکاری سزادراوان و کەسوکاریان ڕۆژی سەردانیکردنیان گۆڕدرا.

 

بەگوێرەی ڕاگەیێنراوەکەش سەردانیکردنی بەندکراوان لە ڕۆژی چوارشەممەوە بۆ ڕۆژی پێنجشەممە بە شێوەیەکی هەمیشەیی گۆڕدراوە.

لێدوانی فەرمی: ئیحسان عەبدولڕەحمان، بەڕێوەبەری گشتیی چاکسازییەکانی هەرێمی کوردستان بە ئاڤا میدیای ڕاگەیاند: ڕۆژانی سێشەممە و چوارشەممە لە چاکسازییەکاندا بۆ 'ژوانی هاوسەران' دانراوە، و کەسوکاری بەندکراوانیش ڕۆژی چوارشەممە بۆ بینینی بەندکراوانیان دەهاتن و قەرەباڵخی و کێشە لە چاکسازی دروست دەبوو، بۆیە ڕۆژی بینینی بەندییەکان بۆ ڕۆژانی پێنجشەممە گۆڕدرا.

٠ لەسەرەتای دەستبەکاربوونم لە ساڵی 2022 لە چاکسازییەکانی کوردستان، 500 بەندکراو مافی ئەوەیان هەبوو 'ژوانی هاوسەری' ئەنجام بدەن، بەڵام تا کۆتایی ساڵی 2024، توانیومانە ژمارەکە بگەیەنین بە 9 هەزار و 272 بەندکراو کە مافی ئەنجامدانی پڕۆسەکەیان هەبێت. 

٠ بەهۆی ئەوەی گرنگی بە دۆخی خێزانی بەندکراوان دراوە، ئێستا ڕێژەی جیابوونەوە لە تەواوی چاکسازییەکاندا گەیشتووەتە سفر. واتا هیچ جیابوونەوەیەک تۆمار نەکراوە. 

٠ سەرجەم ئەو بەندکراوانەی کە خەڵکی شارەکانی دیکەی عێراقیشن و لە چاکسازییەکانی کوردستان بەندکراون، مافی ئەو پڕۆسەیەیان بۆ دەستبەر کراوە. 

 

زانیاریی زیاتر: هەر بەندکراوێک لە چاکسازییەکانی هەرێمی کوردستان لە شەش مانگ زیاتر حکومدرابێت ئەوا مافی ئەنجامدانی پڕۆسەی ژوانی هاوسەری هەیە.