ئوردن و تورکیا بەشداری لە کوژاندنەوەی ئاگری لازقیە دەکەن

ئاڤا نیوز

ئاگرەکەی شاری لازقیە بەهۆی بەهێزیی با جارێکی دیکە سەریهەڵدایەوە و تاوەکو ئێستا کۆنترۆڵ نەکراوە، بۆ ئەو مەبەستەش تیمەکانی ئاگرکوژێنەوە لە هەریەک لە ئوردن و تورکیا بەشدارن بۆ کۆنترۆڵکردنی ئاگرەکە.

 

وێنە گەورەکە: سەرەڕای مەترسی و ئاستەنگە گەورەکان، تیمەکانی ئاگرکوژێنەوە بۆ ماوەی چوار ڕۆژی یەک لەدوای یەک بەردەوامن لە هەوڵەکانیان بۆ کۆنترۆڵکردنی ئەو ئاگرەی لە دارستانەکانی گوندەوارەکانی لازقیە کەوتووەوە.

 

لێدوانی فەرمی: عەبدولکافی کەیال، بەڕێوەبەری بەرگریی شارستانی لە پارێزگای لازقیە، ڕایگەیاند ئەو ئاگرانەی سووریا بەخۆیەوە دەیبینێت، لە تووندترین و مەترسیدارترین ئاگرەکانن لە ماوەی چەندین ساڵی ڕابردوودا.

 

بەربەستەکان: بە گوتەی کەیال، بارودۆخی جوگرافی و خێرایی زۆری با، "ئەرکی ئاگرکوژێنەوەکان و هەموو تیمە کارکەرەکانی قورستر کردووە بۆ  ئەوەی بتوانن ئاگرەکە کۆنترۆڵ بکەن. هاوکات پێشڕەوی ئۆتۆمبێلەکان و تیمەکان لە هەندێک ناوچەدا مەترسیدارە بەهۆی بوونی پاشماوەکانی جەنگەوە، کە تەقینەوەیان دەبێتە هۆی زیاتر پەرەسەندنی ئاگرەکە.

 

ئەوەی ئێستا ڕوودەدات: 62 تیمی ئاگرکوژێنەوەی سەر بە بەرگریی شارستانی بەشدارن، لەگەڵ دوو هێلیکۆپتەر و 11 ئۆتۆمبێل کە لەلایەن تورکیاوە نێردراون. هاوکات تیمەکانی بەرگریی شارستانیی ئوردن ئەمڕۆ یەکشەممە دەستیان بەکارکرد.