%74ـی جووتیارانی هەولێر گەنمیان ڕادەستی سایلۆ کردووە

ئاڤا نیوز

نزیکەی مانگێکە پڕۆسەی وەرگرتنی گەنمی لە پارێزگاکانی هەرێمی کوردستان دەستیپێکردووە و بەشێکی زۆری جووتیارانی هەولێر گەنمەکەیان ڕادەستی سایلۆ کردووە، ئەمڕۆ جووتیارانی دیبەگە و گوێڕیش گەنمەکانیان دێننە هەولێر.

چیرۆکی سەرەکی: ڕۆژی 10ـی حوزەیران پڕۆسەی وەرگرتنی گەنمی ئەمساڵ لە سلێمانی و دهۆک دەستیپێکرد و ڕۆژی 12ـی مانگ لە هەولێر پڕۆسەکە دەستیپێکرد، 400 هەزار تۆن گەنمی جووتیارانی هەرێمی کوردستان وەردەگرێت، 122 هەزار و 600 تۆن بەر جووتیارانی هەولێر دەکەوێت.

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤای گوت، "زیاتر لە 11 هەزار جووتیار لە کۆی 18 هەزار جووتیار بڕی 90 هەزار و 985 تۆن گەنمیان ڕادەستی سایلۆی هەولێر کردووە و پڕۆسەکەش تاوەکو کۆتایی ئەم مانگە بەردەوام دەبێت."

گۆشەیەکی دیکەی دیمەنەکە: بەهۆی ئەوەی لە سایلۆی مەخموور گەنمەکانیان وەرنەگیرا، لە ئەمڕۆوە لە هەولێر دەست بە پڕۆسەی وەرگرتنی گەنمی جووتیارانی دیبەگە و مەخموور دەکرێت و 27 هەزار تۆن گەنم ڕادەست دەکەن.