دۆناڵد ترەمپ هێرش دەکاتە سەر ئیلۆن مەسک و بە "شەمەندەفەرێکی تێکشکاو" ناوی دەبات

ئاڤا نیوز

دۆناڵد ترەمپ، سەرۆکی ئەمریکا، لە لێدوانێکی توونددا هێرشی کردە سەر ئیلۆن مەسک ملیاردێر و خاوەنی کۆمپانیای تێسلا و سپەیس ئێکس، و ڕایگەیاند کە "دڵتەنگە بە بینینی ئەوەی ئیلۆن مەسک لە ماوەی پێنج هەفتەی ڕابردوودا بە تەواوی 'لە ڕێڕەو دەرچووە' و بووەتە 'شەمەندەفەرێکی تێکشکاو'."

وێنە گەورەکە: پەیوەندییەکانی ترەمپ و مەسک دوای تەواوبوونی ئەرکی ملیاردێرە ئەمریکییەکە لە ئیدارەی ترەمپ بەرەو خراپی ڕۆیشتووە و بەهۆی ڕاگەیاندنی پارتێکی نوێوە لەلایەن مەسکەوە پەیوەندییەکانیان زیاتر گرژی تێکەوت.

لێدوانی فەرمی: ترەمپ ڕەخنەی لە خواستی مەسک گرت بۆ دامەزراندنی سێیەم پارتی سیاسیی لە ئەمریکا و وتی: "سیستەمی سیاسیی ئەمریکا بۆ ئەوە دروست نەکراوە کە پارتی سێیەم سەرکەوتوو بێت. تاکە شتێک کە پارتە سێیەمەکان تێیدا باشن، دروستکردنی 'شێواندن و ئاژاوەی تەواوە'، کە ئێمە بەهۆی دیموکراتە ڕادیکاڵە چەپەکانەوە بە پێی پێویست ئەوەمان هەیە."

زانیاریی زیاتر: لە بارەی ئۆتۆمبێلە کارەباییەکانیشەوە کە بەرهەمی کۆمپانیاکەی مەسکن، ترەمپ وتی: "ئێستا خەڵک ئازادە چی بکڕێت، چ ئۆتۆمبێلی بەنزین بێت، چ هایبرێد، یان هەر تەکنەلۆژیایەکی نوێ کە دێتە ئاراوە."

ترەمپ باسی لەوە کرد کە مەسک داوای لێکردبوو یەکێک لە هاوڕێ نزیکەکانی بکرێتە بەڕێوەبەری ئاژانسی ناسا. ترەمپ دان بەوەدا دەنێت کە هاوڕێکەی مەسک کەسێکی "زۆر باش" بووە، بەڵام دوو هۆکار هەبوون بۆ ڕەتکردنەوەی داواکارییەکە، ئەو کەسە "دیموکراتێکی ڕەسەن" بووە و هەرگیز یارمەتیی کۆمارییەکانی نەدابوو. دووەمیش ترەمپ بە "ناشیاوی" زانیوە کە هاوڕێیەکی نزیکی ئیلۆن مەسک، کە خۆی لە بواری بۆشایی ئاسماندا کار دەکات، ببێتە بەڕێوەبەری ناسا، چونکە ئەمە دەبێتە هۆی دروستبوونی ناکۆکیی لەسەر بەرژەوەندی. ترەمپ دەشڵێت، "ئەرکی ژمارە یەکی من پاراستنی خەڵکی ئەمریکایە".