بەرپرسی دەزگای هەواڵگری تورکیا سەردانی بەغدا دەکات

ئاڤا نیوز

وەکو ئامادەکارییەکی پێشوەختە و هەماهەنگی لەگەڵ دەسەڵاتدارانی عێراق، ئیبراهیم کاڵن، سەرۆکی دەزگای هەواڵگری تورکیا بە سەردانێکی فەرمی دەگاتە شاری بەغداد.

وێنە گەورەکە: هەردوو دەزگای هەواڵگریی تورکیا (میت) و دەزگای هەواڵگریی عێراق بە ئاگاداری و هەماهەنگیی حکومەتی هەرێمی کوردستان، ئامادەکاریی پێویستییان کردووە بۆ ڕێکخستنی شێوازی چەکدانانی پەکەکە، چاوەڕوان دەکرێت ڕۆژی هەینی، پەکەکە بۆ سەلماندنی نیازپاکی خۆیان، یەکەم گەڕی چەکدانان جێبەجێ بکات.

زانیاریی زیاتر: ئیبراهیم کاڵن، سەرۆکی دەزگای هەواڵگریی تورکیا بڕیارە ئەمڕۆ سێشەممە سەردانی بەغدا بکات، دواتر کۆبوونەوە لەگەڵ بەرپرسانی عێراق بکات سەبارەت بە پڕۆسەی چەکدانانی پەکەکە لە ناوچەکە. 

لەلایەکی دیکەوە:  نووسینگەی ڕاگەیاندنی کۆما جڤاکێن کوردستان (کەجەکە) ڕایگەیاند، ئەو مەراسیمەی بڕیار بوو لە پارێزگای سلێمانی بەڕێوە بچێت، گۆڕانکارییەک لە شێوازی مەراسیمەکە کراوە، ڕۆژنامەنووسان ناتوانن ڕاستەوخۆ بەشداری مەراسیمەکە بن، بەڵکو لە شوێنێکی نزیکی مەراسیمەکە شاشەیەکی گەورە ئامادە دەکرێت، دوای ئەنجامدانی مەراسیمەکە، ڤیدیۆکەی لەو شوێنە بۆ ڕۆژنامەنووسان پەخش دەکرێت.