لە کۆبوونەوەی ئەنجوومەنی وەزیران چۆن باسی دابەشکردنی مووچە کراوە؟

ئاڤا نیوز

وەزیری دارایی و ئابووری هەرێمی کوردستان نێوەڕۆکی کۆبوونەوەی ئەنجوومەنی وەزیرانی لەبارەی دابەشکردنی مووچە ئاشکرا کرد و گوتی؛ هیچ کەس و لایەنێک دژی دابەشکردنی نەبووە، بەڵام هیچ کەسێکیش ڕازی نەبوو بەبێ مووچەی پێشمەرگە و هێزە ئەمنییەکان دەست بە دابەشکردنی بکرێت.

وێنە گەورەکە: ئاوات شێخ جەناب، وەزیری دارایی و ئابووری هەرێمی کوردستان، لە دیدارێکی ڕۆژنامەوانیدا کە ئەمشەو بڵاوکرایەوە، ئەو دەنگۆیەی ڕەتکردەوە کە لایەنێک یان هەندێک لایەن لە کۆبوونەوەی ئەنجوومەنی وەزیران داوایان کردبێت دەست بە دابەشکردنی مووچەی مانگی دوو بکرێت و لایەنێک ڕەتی کردبێتەوە.

لێدوانی فەرمی: ئاوات شێخ جەناب ڕایگەیاند: لە کۆبوونەوەی ئەنجوومەنی وەزیران هەموو لایەنەکان باسیان لە دابەشکردنی مووچە و گرفتەکانی کرد و لەوێ پرسیار کرا ئایا کەس ڕازییە مووچە نەدرێت بە هێزە ئەمنییەکان و پێشمەرگە؟ یەک کەس ناڕەزایەتی دەرنەبڕی."


زانیاریی زیاتر: لە کۆبوونەوەکەدا دوو وەزیری گۆڕان و لە تیمی یەکێتی چوار یان پێنج وەزیر ئامادەبوون، بەر لە چوونە نێو کۆبوونەوەکە لەگەڵ تیمی یەکێتی و نووسینگەی قوباد تاڵەبانی قسە کراوە، بەگوتەی وەزیری دارایی لایەنێک نەبووە داوای کردبێت مووچە دابەش بکرێت و لایەنێکی دیکە ڕەتی کردبێتەوە.

ئەوەی پێویستە بیزانیت: ئاوات شێخ جەناب باسی لەوە کرد کە زۆربەیان باسیان لەوە کردووە خەڵک پێویستی بە مووچەیە و ڕەمەزانە، بەڵام کە هاتووتە سەر ئەوەی ئایا دەکرێ مووچەی مەدەنی و سەربازی لەیەک جیابکرێتەوە، کەس دەنگی بە جیاکردنەوەیان نەداوە، کە قسەکان تەواو بوون، سەرۆکوەزیران گوتوویەتی کەس ناڕەزایەتیی هەیە؟ کەس هیچی نەگوتووە و ئەویش پێکەنیوە و گوتوویەتی بێدەنگی نیشانەی ڕازیبوونە.