ئێران: ئەمریکا نامەیەکی بۆ ناردووین

ئاڤا نیوز

یاریدەدەری وەزیری دەرەوەی ئێران ڕایدەگەیێنێت، لەلایەن واشنتنەوە نامەیەک ئاراستەی تاران کراوە و داوای دەستپێکردنەوەی دانوستاندنەکان دەکەن.

 

وێنە گەورەکە: دوای هێرشەکانی ئیسرائیل و ئەمریکا بۆ سەر ئێران و بنکە ئەتۆمییەکانی، ئێستا کۆمەڵگەی نێودەوڵەتی لە هەوڵی دەستپێکردنەوەی دانوستاندنەکانن لەگەڵ تاران و هەوڵی ڕێگریکردن لە دووبارە سەرهەڵدانەوەی جەنگ دەدەن.

 

لێدوانی فەرمی: سەعید خەتیب زادە، یاریدەدەری وەزیری دەرەوەی ئێران ئەمڕۆ سێشەممە ڕایگەیاند: "لە چەند ڕۆژی ڕابردوودا لەلایەن ئەمریکاوە نامەیەکمان بەدەست گەشتووە و داوای دووبارە دەستپێکردنەوەی دانوستاندنەکان دەکەن". دەشڵێت، گفتوگۆ و دانوستاندن پێویستی بە متمانە هەیە و ئەمریکا لەکاتی دانوستاندنەکان هێرشی کردە سەر ئێران و ڕێگەی دیپلۆماسی داخست.

 

سەبارەت بە هەڵوێست و وەڵامی ئێران، خەتیب زادە ڕایگەیاند: ڕێگەی دیپلۆماسی بنەمای سەرەکیی ئێرانە لە پەیڕەوکردنی سیاسەتی نێودەوڵەتی و لە ڕابردووشدا هەر بەو شێوەیە مامەڵەمان کردووە.

 

لەلایەکی دیکەوە: ستیڤ ویتکۆڤ، نێردەی تایبەتی سەرۆکی ئەمریکا بۆ ڕۆژهەڵاتی ناوەڕاست ڕایگەیاند، هەفتەی داهاتوو لەگەڵ ئێران کۆبوونەوەیەک دەکەین و دۆخی ئێستای پەیوەندییەکانی نێوان تاران و واشنتن و بەرنامەی ئەتۆمی ئێران گفتوگۆی لەسەر دەکرێت.

 

باکگراوند: لە سەروبەندی دانوستاندنەکانی نێوان ئێران و ئەمریکا لەسەر بەرنامە ئەتۆمییەکەی ئێران، لە 13 - 6 - 2025، ئیسرائیل هێرشی کردە سەر ئێران، ئەمریکاش بە هێرشکردنە سەر پێگە ئەتۆمییەکانی فۆردۆ، نەتەنز و ئەسفەهان بەشداربوو کە بە جەنگی "12 ڕۆژە" ناوی دەرکرد. دواتریش بە نێوەندگیریی ئەمریکا و قەتەر، ئێران و ئیسرائیل ئاگربەستیان ڕاگەیاند.