ئەنجامی تاقیکردنەوەکانی پۆلی 12ی ئامادەیی ڕادەگەیێنرێ

ئاڤا نیوز
 
ئەنجامی تاقیكردنەوەكانی ئەمساڵی پۆلی 12 ئاشكرا دەكرێت، بەڵام جیاواز لە ساڵانی ڕابردوو و بە بڕیاری وەزارەتی پەروەردە هیچ مەراسیمێك ڕێكناخرێت و ناوی قوتابییە یەكەمەكانیش دیار ناكرێن.

چیرۆکی سەرەکی: لە ڕۆژی 1ی6ی ئەمساڵ بە بەشداریی زیاتر لە 115 هەزار قوتابی لە هەرسێ بەشی زانستی، وێژەیی و پیشەیی تاقیکردنەوەکانی پۆلی 12ی ئامادەیی لە هەرێمی کوردستان دەستی پێكرد و لە ڕۆژی 6ی ئەم مانگە تاقیكردنەوەكان كۆتاییان هات، وا بڕیارە كاتژمێر (7:00)ی ئێوارەی ئەمڕۆ تەواوی ئەنجامی تاقیكردنەوەكانی خولی یەكەم لەلایەن وەزارەتی پەروەردەوە ڕابگەیێنرێت.

لە ساڵانی ڕابردوو، ئەنجامەكان لە مەراسیمێكدا لەلایەن وەزارەتی پەروەردەوە ڕادەگەیێنران و قوتابیانی یەكەم و دووەم و سێیەم لەسەر ئاستی هەرێمی كوردستان و پارێزگاكان و  لەسەر ئاستی بەشەكانیش ئاشكرا دەكران، بەڵام ئەمساڵ وەزارەتی پەروەردە بڕیاری دا هیچ مەراسیمێك نەكرێت و هیچ ناوێكیش ئاشكرا نەكرێت.

لێدوانی فەرمی: د. سەیوان عەلی، بریکاری وەزارەتی پەروەردەی حکومەتی هەرێمی کوردستان بە ئاڤای وت، "مانگێک زیاترە نووسراومان بۆ هەموو پەروەردەکان لە هەموو پارێزگاکان کردووە، بۆ ڕاگەیاندنی ئەنجامەکان هیچ مەراسیمێک بەڕێوەناچێت، یەکەم و دووەم و سێیەمەکان دیاری ناکرێت. ئەمەش لەپێناو دروستنەکردنی جیاوازییە لەنێوان قوتابیان".

ئەوەی پێویستە بیزانیت: ئەمساڵ تاقیكردنەوەكانی پۆلی 12 بەراورد بە ساڵانی ڕابردوو درەنگتر كۆتاییان هات، ئەویش بە هۆی ئەوەی كە ماوەی هەفتەیەك و بە دیاریكراوی لە ڕۆژی 14ی6 تاقیكردنەوەكان بەهۆی جەنگی نێوان ئێران و ئیسرائیل وەستان و 22ی6 دەستیان پێكردەوە.

زانیاریی ئاڤا: بەپێی زانیارییەكانی ئاڤا میدیا خولی دووەمی تاقیكردنەوەكانی پۆلی 12 لە ڕۆژی 23ی8 دەستپێدەكات و تاوەكوو 31ی8 بەردەوام دەبێت.