مەسرور بارزانی: دوو ملیۆن هاووڵاتی لە هەرێمی کوردستان کارەبای 24 کاتژمێرییان هەیە

ئاڤا نیوز

سەرۆکوەزیران مەسرور بارزانی ڕایگەیاند، ئێستا دوو ملیۆن هاونیشتمانی کارەبای 24 کاتژمێرییان هەیە و تا کۆتایی ساڵی 2026، پڕۆژەکە دەگاتە هەموو ماڵ و شوێنە بازرگانییەکان.

چیرۆکی سەرەکی: پڕۆژەی ڕووناکی، پڕۆژەیەکی ستراتیژیی حکومەتی هەرێمی کوردستانە کە لە کابینەی نۆیەم بڕیاری لەسەر درا و کەوتە بواری جێبەجێکردنەوە، بەپێی ئەو پلانەی دانراوە تا کۆتایی ساڵی 2026 کارەبای سەرجەم ماڵ و شوێنە بازرگانییەکان دەبێتە 24 کاتژمێری بە تێچووی کەمتر و لە ژینگەیەکی پاکتر.

پەیامی فەرمی: سەرۆکوەزیران، مەسرور بارزانی، لە تۆڕی کۆمەڵایەتیی ئێکس، ڕایگەیاند، ئێستا دوو ملیۆن هاووڵاتی لە هەرێمی کوردستان، لەڕێی پڕۆژەی ڕووناکییەوە، کارەبای 24 کاتژمێرییان هەیە. هاوکات تا کۆتایی ساڵی 2026، پڕۆژەکە دەگاتە هەموو ماڵ و شوێنە بازرگانییەکان لە سەرتاسەری هەرێمی کوردستاندا.

ئەوەی پێویستە بیزانیت: پڕۆژەی ڕووناکی تا دێت فراونتر دەبێت و ئێستا گەیشتووەتە دوو ملیۆن هاونیشتمانی کە دەکاتە لە 30%ـی هاونیشتمانیانی هەرێمی کوردستان، لە هەولێر و سلێمانی و دهۆک فراوان کراوە، کە هەردوو بازنەی 150 مەتریی هەولێر و 60 مەتریی لە سلێمانی دەگرێتەوە.

باکگراوند: ڕۆژی 17-10-2024 مەسرور بارزانی، سەرۆکوەزیرانی کوردستان لە گەڕەکی شادی هەولێر پڕۆژەی ڕووناکی ڕاگەیاند، ئێستا ڕێژەی 80%ـی هاونیشتمانیان پارەی کەمتر دەدەن بەراورد بە پارەی کارەبای نیشتمانی و مۆلیدە.