ئاڤا هۆكاری نەكردنەوەی دادگای كارگێڕی لە هەڵەبجە ئاشكرا دەكات

ئاڤا نیوز

هاوشێوەی پارێزگاكانی دیكەی هەرێمی كوردستان، بڕیاربوو لە ئاییندەیەكی نزیكدا دادگای كارگێڕی لە پارێزگای هەڵەبجەش بكرێتەوە، بەڵام ئاڤا لە زاری سەرۆكی ئەنجوومەنی شوورای هەرێمی كوردستان ئاشكرای دەكات بەهۆی نەبوونی پێداویستی لۆجستی، پرۆژەكە تا ئێستا جێبەجێ نەكراوە.

وێنە گەورەکە: ئەنجوومەنی شوورای هەرێمی كوردستان، كە یەكێكە لە دەزگا گرنگ و سەرەكییەكانی وەزارەتی دادی حكومەتی هەرێمی كوردستان، تاوەكوو ئێستا توانیویەتی لە هەر سێ پارێزگای (هەولێر، سلێمانی و دهۆك) دادگای كارگێڕی دابمەزرێنێت؛ ئەمەش لەپێناو سەرخستن و برەودان بە سیستمی دادوەریی دووانی لە هەرێمی كوردستان هاوشێوەی وڵاتە پێشكەوتووەكانی جیهان.

ئەوەی پێویستە بیزانیت: سیستمی دادوەریی دووانە، بە واتای هەبوونی دوو جۆر دادگا دێت، یەكێكیان بۆ یەكلاییكردنەوەی كێشە و ناكۆكییەكانی نێوان هاووڵاتیان و كەسایەتیە مەعنەوییەكانی هاوشێوەی كۆمپانیا و دامەزراوە ئەهلییەكانە، كە ئەم جۆرەیان پێی دەوترێت 'دادگای ئاسایی'، دووەمیشیان بۆ یەكلاییكردنەوەی كێشە و ناكۆكییەكانی نێوان هاووڵاتی و حكومەتە، ئەو كاتەی تاك قەناعەتی وایە دەزگایێكی حكومی، مافی زەوت كردووە یاخود ڕێگرە لەبەردەم گەیشتن بە شایستەكانی، ئەمجۆرەشیان پێی دەوترێت 'دادگای كارگێڕی'.

لێدوانی فەرمی: دادوەر سەردار یاسین، سەرۆكی ئەنجوومەنی شوورای هەرێمی كوردستان، ڕایگەیاند، وەزارەتی داد بۆ كردنەوەی دادگای كارگێڕی لە پارێزگای هەڵەبجە پڕۆژەیەكی هەبوو، بەڵام بەهۆی هەندێك پێداویستیی لۆجستییەوە تا ئێستا پڕۆژەكە جێبەجێ نەكراوە.

بۆچی گرنگە: هەبوونی دادگای كارگێڕی زامنی پاراستنی مافی هاووڵاتیان دەكات لەو كاتەی هەست دەكات لەلایەن لایەنێكی باڵادەستی هاوشێوەی دامەزراوە حكومییەكان مافی پێشێل دەكرێت یاخود شایستەی پێ نادرێت، هاووڵاتی دەتوانێت لەڕێگەی دادگای كارگێڕییەوە سكاڵا لە دامەزراوە حكومییەكان بكات و داوای وەرگرتنەوەی مافەكانی بكات كە بۆچوونی وابێت لێی زەوت كراوە.