ڕێکخراوی لێبووردنی نێودەوڵەتی داوای بڵاوکردنەوەی ئەنجامی لێکۆڵینەوەی کوشتاری عەلەوییەکان دەکات

ئاڤا نیوز

ڕێکخراوی لێبووردنی نێودەوڵەتی، ئەمنێستی ئینتەرناشناڵ، ڕایگەیاند پێویستە سووریا ئەنجامی تەواوی لێکۆڵینەوەکان لەسەر کوشتنی هاووڵاتیانی عەلەوی لە مانگی ئاداری ڕابردوو بڵاوبکاتەوە و دڵنیا بێت کە بەرپرسیارانی ئەم تاوانە دەبرێنە بەردەم دادپەروەری.

چیرۆکی سەرەکی: دوای گرژی و ئاڵۆزییەکانی مانگی ئاداری ڕابردوو کە کۆمەڵە چەکدارێکی پاشماوەی رژێمی بەشار ئەسەد کە زۆرینەیان عەلەوی بوون، هێرشیان کردە سەر هێزە ئەمنییەکانی سووریا و بۆح ماوەیچەند ڕۆژێک بەردەوام بوو، چاودێری سووری بۆ مافەکانی مرۆڤ، لە کوشتاری ئەم پێکهاتە ئایینییەدا زیاتر لە هەزار و 700 کەس کوژران.

دەستەڵاتی نوێی سووریا، کە لە دوای کەوتنی ڕژێمی بەشار ئەسەدەوە هاتە سەر دەستەڵات، بڕیاری ئەنجامدانی لێکۆڵینەوەی دەرکرد و بەڵێنی دا لە ماوەی مانگێکدا ئەنجامەکان ڕابگەیەنن، بەڵام دواتر و لە ڕۆژی 10-4-2025 ئەنجامەکانیان بۆ سێ مانگی دیکە دواخست.

لێدوانی فەرمی: کریستین بێکەرلی، جێگری بەڕێوەبەری هەرێمیی ئەمنێستی ئینتەرناشناڵ بۆ ڕۆژهەڵاتی ناوەڕاست و باکووری ئەفریقا، گوتی: "سەرۆک شەرع دەبێت پابەند بێت بە بڵاوکردنەوەی تەواوی دۆزینەوەکانی کۆمیتەی دۆزینەوەی ڕاستی لەسەر کوشتنە بەکۆمەڵەکانی هاووڵاتیانی عەلەوی لە ناوچە کەنار دەریاییەکان و دڵنیا بێت لەوەی کە بەرپرسیاران دەبرێنە بەردەم دادپەروەری."

بێکەرلی ڕاشیگەیاند: "ڕزگاربووان و خێزانەکانی قوربانیان مافی ئەوەیان هەیە بزانن چی ڕوویدا، کێ بەرپرس بوو و دەسەڵات چ هەنگاوێکی بەرجەستەی بۆ گەیاندنی دادپەروەری ناوە."