ئەردۆغان سوپاسی هەرێمی کوردستان دەکات

ئاڤا نیوز

ڕەجەب تەیب ئەردۆغان، سەرۆککۆماری تورکیا ڕایگەیاند، سوپاسی هێزە ئەمنییەکانی حکومەتی هەرێمی کوردستان و عێراقی کرد بۆ ئەوەی هاوکارییان بوون لە دابینکردنی ئەمنییەتی مەراسیمی چەکدانانی پەکەکە. 

چیرۆکی سەرەکی: ڕۆژی هەینی یەکەم گەڕی چەکدانانی پەکەکە لە سنووری سلێمانی بەڕێوەچوو، ئەمەش کاردانەوەی ناوخۆی و جیهانی بەدوای خۆیدا هێنا، لە تورکیاش بەشێوەیەکی ئەرێنی باس لە سەرخستنی پڕۆسەی ئاشتیی دەکرێت. 

لێدوانی فەرمی: ڕەجەب تەیب ئەردۆغان، سەرۆککۆماری تورکیا لە کۆبوونەوەیەکی جەماوەری پارتەکەیدا وتارێکی مێژووی پێشکەش کرد و سوپاسی ئاراستەی هێزە ئەمنییەکانی هەرێمی کوردستانی و عێراق کرد و ڕۆڵی بەرز نرخاندن. باسی لەوەشکرد "هەولێر و کەرکووک و ئەنقەرە، حەلەب و موسڵ شاری هاوبەشی هەموومانە".

لە بەشێکی دیکەی وتارەکەیدا سەرۆککۆماری تورکیا باسی لەوەکرد، 10 هەزار سەربازی تورک لە شەڕی تیرۆر کوژراون، هەموومان بەیەکەوە باجی تیرۆرمان دا، تورکیا بەهۆی تیرۆرەوە ئارامی و سەقامگیر تێکچووە، بەهۆی تیرۆرەوە بە بڕی 2 ترلیۆن دۆلار زیانی ماددی بەر تورکیا کەوتووە.

هاوکات باسی لەوەشکرد، پرسی کورد لە سووریا و عێراق پرسی ئێمەیە، لەگەڵ ئەوانیش قسە لەسەر ئەم پرۆسەیە دەکەین، هەنگاوەکان زۆرباش بەرەوپێش دەچن و ئومێد بەخشن.