ئەم هەفتەیە گەشتی عومرە دەستپێدەکاتەوە

ئاڤا نیوز

خەڵکێکی زۆر لە هەرێمی کوردستان چاوەڕوانی کردنەوەی گەشتی عومرەیە، دوای گۆڕینی بەشێک لە ڕێنماییەکان، بڕیارە لەم هەفتەیە گەشتەکان دەستپێبکەنەوە.

وێنە گەورەکە: ساڵانە بەهۆی پرۆسەی حەج گەشتەکانی عومرە لە سەرانسەری جیهانەوە  بۆ سعوودیە دەوەستن. ئەمساڵ ماوەی کردنەوەی گەشتەکان لە هەرێمی کوردستان کاتێکی زۆرتری ویست، ئەمەش دوای وەستانی گەشتە ئاسمانییەکان بەهۆی جەنگی نێوان ئێران و ئیسرائیل و لە هەرێمی کوردستانیش بەهۆی گۆڕانکاری لە ڕێنماییەکان ئەم پرۆسەیە زیاتر دواکەوت.

لێدوانی فەرمی: کاروان ستوونی، وتەبێژی بەڕێوەبەرایەتی گشتی حەج و عومرەی کوردستان بە ئاڤا میدیای ڕاگەیاند، بەشێک لە ڕێنماییەکانمان دەستکاری کردووە لە بەرژەوەندی عومرەکاران، ناردوومانە بۆ وەزارەتی ئەوقاف و کاروباری ئاینی چاوەڕوانین ئەم هەفتەیە بگەڕێتەوە، لەگەڵ گەڕانەوەی گەشتەکانی عومرە دەستپێدەکەنەوە.

زانیاریی زیاتر: کاروان ستوونی ئەوەش دەڵێت: ژمارەیەکی زۆری خەڵک لە کوردستان پاسپۆرتی داوەتە کۆمپانیاکان و چاوەڕێن تا گەشتی عومرە بکەن، بۆیە ئەگەر لەلایەن وەزارەتەوە هیچ گۆڕانکارییەک لە بڕگەی ڕێنماییەکان نەکرا، ڕاستەوخۆ گەشتەکان لە ڕێگای وشکانی و ئاسمانی دەستپێدەکەنەوە.