پەیامێک لە بارەگای بارزانی لەبارەی مووچە

ئاڤا نیوز

لەبارەی هەڵوێستی پارتی بەرامبەر بەغدا، بارەگای بارزانی ڕایگەیاند، کەسایەتییە سیاسییەکان و حکومەتی فیدراڵی بەڵێنی چارەسەرکردنی پرسی ناردنی مووچە و شایستە داراییەکانی هەرێمی کوردستان لە چەند ڕۆژی داهاتوو دەدەن، بۆیە دوا دەرفەت بە حكومەتی فیدراڵ دەدەین، بۆ ئەوەی ڕێگەیەک بۆ کۆتایهێنان بەم کێشەیە بدۆزنەوە.

وێنە گەورەکە: کێشەکانی نێوان هەولێر و بەغدا بەردەوامن و حکومەتی هەرێمی کوردستان سەرجەم داواکارییەکانی جێبەجێکردووە، بەڵام حکومەتی فیدراڵی بیانوو دەگرێت و ماوەی دوو مانگ زیاترە مووچەی ڕەوانە نەکردووە.

چیرۆکی سەرەکی: ڕۆژی شەممە، بە سەرپەرشتی سەرۆک بارزانی و بە ئامادەبوونی د. فوئاد حوسێن، مەکتەبی سیاسیی پارتی دیموکراتی کوردستان کۆبووەوە، ئامانج لە کۆبوونەوەکەش تاوتوێکردنی بژاردەکانی بەردەم کورد بەرامبەر بەغدا بوو، یەکێک لەوانەش کشانەوە بوو لە پرۆسەی سیاسی عێراق.

ڕاگەیێنراوی فەرمی: شەوی شەممە 12-7-2025، بارەگای بارزانی ڕایگەیاند: پەیوەست بە کێشەکانی نێوان هەرێمی کوردستان و حکومەتی عێراقی فیدراڵ، هەروەها لەسەر یەکلاییکردنەوەی پرسی مووچە و بودجە و شاییستە داراییەکانی هەرێمی کوردستان، مەکتەبی سیاسیی پارتی بۆ وەرگرتنی هەڵوێستی پێویست کۆبوویەوە.

لە ڕاگەیێنراوەکەی بارەگای بارزانی هاتووە:

٠ ڕۆژی شەممە، دوای گفتوگۆی لەگەڵ لایەنە سیاسییەکانی عێراق، فوئاد حوسێن گەڕایەوە هەرێمی کوردستان و بە مەكتەبی سیاسیی پارتی ڕاگەیاند، لایەنەکان و کەسایەتییە سیاسییەکان و حكومەتی فیدراڵ بۆ چارەسەرکردنی ئەو کێشەیە بەڵێنی ئەوەیان داوە کە لە چەند ڕۆژی داهاتوودا پرسی ناردنی مووچە و شاییستە داراییەکانی هەرێمی كوردستان  چارەسەر بکرێت.

٠ "لەسەر داوا و بەڵێنی ئەوان هەروەها لەپێناو بەردەوامبوونی گفتوگۆیەكی هێمنانە و ڕەچاوکردنی بارودۆخ و بەرژەوەندیی گشتیدا، پێمان باش بوو دوا دەرفەت بە حكومەتی فیدراڵ بدەین، بۆ ئەوەی ڕێگەیەک بۆ کۆتایهێنان بەم کێشەیە بدۆزنەوە".

٠ "هەمیشە بڕوامان بەوە هەبووە ئەگەر ڕێگەی گفتوگۆ هەبێت، ئێمەش پێمان باشە بە لەیەکتر تێگەیشتن كێشەكان چارەسەر بكەین".