جومانە غەلای: تاوەکو ئێستا وادەی بانگەشەی هەڵبژاردن دیاری نەکراوە

ئاڤا نیوز

کۆمیسیۆنی هەڵبژاردنەکانی عێراق بۆ ئاڤا میدیا ئەو دەنگۆیانە ڕەتدەکاتەوە کە وادەی دەستپێکردنی بانگەشەی هەڵبژاردنی داهاتووی پەرلەمانیان ڕاگەیێنرا بێت. 

وێنە گەورەکە: کۆمیسیۆنی باڵای هەڵبژاردنەکانی عێراق بەردەوامە لە ئامادەکارییەکانی بەڕێوەبردنی پرۆسەی هەڵبژاردنی خولی شەشەمی پەرلەمانی عێراق کە بڕیارە لە مانگی تشرینی دووەمی ئەمساڵ بەڕێوەبچێت، دوای تەواوبوونی وردبینیکردنی ناوی کاندیدەکان وادەیەک بۆ دەستپێکردنی بانگەشە دیاری دەکات.

لێدوانی فەرمی: جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عێراق بە ئاڤا میدیای ڕاگەیاند: وادە و ماوەی بانگەشەی هەڵبژاردنی پەرلەمان لەلایەن ئەنجوومەنی کۆمیسیارانی کۆمیسیۆنەوە دیاری دەکرێت و تاوەکو ئێستا هیچ وادەیەک دیاری نەکراوە.

کۆمیسیۆن لە قۆناغی وردبینیکردنی ناوی کاندیدەکانە و هێشتا تەواو نەبووە.

زانیاریی زیاتر: بەشێک لە میدیاکانی عێراق بڵاویانکردووەتەوە، کۆمیسیۆن ڕۆژی 08-10-2025 بۆ ماوەی مانگێك وەکو ماوەی بانگەشەی هەڵبژاردن دیاری کردووە.