فراكسیۆنە كوردستانییەكان بۆ پرسی مووچە لەگەڵ شاخەوان عەبدوڵڵا كۆدەبنەوە

ئاڤا نیوز

بڕیارە ئەمشەو فراكسیۆنە كوردستانییەكان لەگەڵ جێگری سەرۆكی پەرلەمانی عێراق كۆببنەوە، پرسی مووچەی هەرێمی كوردستان تەوەری سەرەكیی كۆبوونەوە دەبێت.

وێنە گەورەکە: زیاتر لە 70 ڕۆژە بەغدا مووچەی فەرمانبەرانی کوردستانی ڕاگرتووە، سەرەڕای هەوڵەکانیش لە ئەنجوومەنی وەزیرانی عێراق، دادگای فیدراڵی و پەرلەمانی عێراق، تائێستا بڕیاری ناردنی مووچە نەدراوە، دوێنێش بارەگای بارزانی بڵاویکردەوە،  لە بەغداوە بەڵێنی چارەسەرکردنی پرسی ناردنی مووچە و شایستە داراییەکانی هەرێمی کوردستان لە چەند ڕۆژی داهاتوو دراوە.

لێدوانی فەرمی: د. ڤیان سەبری، سەرۆكی فراكسیۆنی پارتی دیموكراتی كوردستان لە پەرلەمانی عێراق بە ئاڤای ڕاگەیاند، وەزیرە كوردەكانی حكومەتی فیدراڵ و فراكسیۆنەكانی پارتی، یەكێتی، یەكگرتوو و كۆمەڵی دادگەری، لەگەڵ د. شاخەوان عەبدوڵڵا، جێگری سەرۆكی پەرلەمانی عێراق كۆدەبنەوە.

زانیاریی ئاڤا: ئاڤا زانیویەتی فراكسیۆنی نەوەی نوێ بەشداری ئەم كۆبوونەوەیە ناكات.

لەلایەکی دیکەوە: ئەمڕۆ ئەنجوومەنی وەزیرانی هەرێمی کوردستان بەسەرپەرشتی سەرۆکوەزیران مەسرور بارزانی و ئامادەبوونی قوباد تاڵەبانی

؛ جێگری سەرۆکوەزیران، لە هەولێر کۆبووەوە کە تایبەت بوو بە دابینکردنی مووچە و ئەنجامی گفتوگۆکان لەگەڵ حکومەتی عێراق.

لە کۆبوونەوەکەدا، جەخت لە چڕکردنەوەی هەموو هەوڵەکان لەگەڵ حکومەتی فیدراڵ کرا بۆ چارەسەرکردنی کێشەکە، لەمبارەیەوە کۆدەنگیی و هاوهەڵوێستیی هەیە بۆ دەستەبەرکردنی مووچە و شایستە داراییەکانی خەڵکی کوردستان.