نوێترین هەڵوێستی ئەمریکا لەبارەی مووچە و کێشەکانی نێوان هەولێر و بەغدا

ئاڤا نیوز

ئەمریکا لەڕێگەی باڵێۆزخانەکەی لە بەغدا نوێترین هەڵوێستی خۆی لەبارەی پرسی مووچە و کێشەکانی نێوان هەولێر و بەغدا ڕادەگەیێنێت و دەڵێت، "هانی هەردوولا دەدەین کە لەڕێگەی گفتوگۆی بوونیادنەرەوە کێشەکانیان چارەسەر بکەن".

وێنە گەورەکە: زیاتر لە 70 ڕۆژە بەغدا مووچەی فەرمانبەرانی کوردستانی ڕاگرتووە، سەرەڕای هەوڵەکانیش لە ئەنجوومەنی وەزیرانی عێراق، دادگای فیدراڵی و پەرلەمانی عێراق، تائێستا بڕیاری ناردنی مووچە نەدراوە. لەم بارەیەوە ئەمریکا نوێترین هەڵوێستی خۆی ڕاگەیاند و داوا دەکات هەولیر و بەغدا لەڕێگەی گفتوگۆوە کێشەکان چارەسەر بکەن.

لێدوانی فەرمی: وتەبێژێک بەناوی باڵیۆزخانەی ئەمریکا لەبەغدا بە ئاڤا میدیای ڕاگەیاند، "ئێمە هانی هەولێر و بەغدا دەدەین کە کێشەکانیان لەڕێگەی گفتووگۆی بونیاتنەرانەوە چارەسەر بکەن".

- چارەسەرکردنی پرسی مووچە، وا دەکات عێراق ژینگەیەک دروست بکات کە کۆمپانیا ئەمریکییەکان حەز بکەن بێن وەبەرهێنانی تێدا بکەن.

- چارەسەرکردنی سەرکەوتووانەی پرسی مووچە، ئاماژەیەکی ئەرێنیی دەبێت بۆ هاوکاریی فراوانتر و لە بەرژەوەندی هەموو عێراقدا دەبێت، بەتایبەت ئەو کاتەی کە بۆری نەوتی عێراق تورکیا دەکرێتەوە و گەڕان بەدوای وزەدا زیاتر دەبێت، ئەویش بە بەشداری کۆمپانیا ئەمریکییەکان.