ڕوانگەی سووری بۆ ئاڤا: ئاماری قوربانییانی سوەیدا بەرزدەبێتەوە و شەڕ بۆ دەرەوەی شار گواستراوەتەوە

ئاڤا نیوز

شاری سوەیدای سووریا بووەتە گۆڕەپانی پێکدادانێکی تووند لەنێوان گرووپە چەکدارە خۆجێیەکانی سوەیدا و خێڵە بەدەوییەکان. بەو هۆیەشەوە تاوەکو ئێستا 18 کەس کوژراون و نزیکەی 50 کەسی دیکەش بریندارن.

چیرۆکی سەرەکی: چەند ڕۆژێکە شەڕ و پێکدادانێکی تووند لەنێوان گرووپە چەکدارە خۆجێیەکان لە شاری سوەیدا و خێڵە بەدەوییەکان بەردەوامە، هەردوولا چەکی قورس وەک هاوەن، ئاڕ پی جی و دۆشکەیان لە دژ یەک بەکارهێناوە.

لێدوانی فەرمی: ڕوانگەی سووری بۆ مافەکانی مرۆڤ لە نوێترین زانیارییدا کە بە تایبەت بە ئاڤا میدیای داوە، ڕایگەیاند، ئاماری قوربانییانی پێکدادانە چەکدارییەکانی پارێزگای سوەیدا، بەرزبووەتەوە بۆ 18 کوژراو و نزیکەی 50 بریندار کە لەنێویاندا منداڵ هەن و باری تەندروستیی هەندێکیان ناجێگیرە.

چی ڕوودەدات: ڕوانگەکە ئاماژەی بەوەشکردووە کە پێکدادانەکان لە گەڕەکی "مەقوس"ـەوە بۆ گوندەکانی دەوروبەری سوەیدا گواستراونەتەوە. خێڵە بەدەوییەکان کۆنترۆڵی دەوروبەری شارۆچکەی "تەیرە"ـیان کردووە و لەوێ گەنجێکی درووز کوژراوە. هاوکات، گوندی "لبین"ـیش بووەتە گۆڕەپانی شەڕێکی تووند.

زانیاریی بەدەستهاتوو: بەپێی زانیارییەکانی ڕوانگەکە، گرژییەکان زیاتر تەشەنەیان سەندووە و هێزی پشتیوانیی چەکداری لە ناوچەکانی حۆرانەوە گەیشتووەتە سوەیدا بۆ پشتیوانیکردنی خێڵە بەدەوییەکان. دەیان چەکدار لە گوندەکانی درعاوە بەرەو بەرەکانی شەڕ لە باکوور و ڕۆژئاوای سوەیدا جووڵەیان کردووە، ئەمەش پێشبینیی تووندتربوونی شەڕەکە لە کاتژمێرەکانی داهاتوودا زیاد دەکات.

کاریگەریی و لێکەوتەکان: هێزە ئەمنییەکان ناچار بوون ڕێگای سەرەکیی دیمەشق-سوەیدا لە چەند شوێنێکەوە دابخەن بۆ پاراستنی گیانی هاووڵاتییان.

هۆکارە زانراوەکان: بەگوێرەی ڕوانگەی سووری سەرچاوەی ئەم ئاڵۆزییانە دەگەڕێتەوە بۆ چەند ڕۆژێک لەمەوبەر، کاتێک گەنجێکی خەڵکی سوەیدا لەسەر ڕێگای دیمەشق-سوەیدا لەلایەن گرووپێکی چەکداری خێڵەکانەوە هێرشی کرایە سەر، لێی درا و کەلوپەلەکانی دزرا. وەک کاردانەوەیەک، چەکدارانی خۆجێی سوەیدا هەستان بە دەستبەسەرکردنی چەند ئەندامێکی خێڵەکان، ئەمەش بووە هۆی تەقینەوەی بارودۆخەکە و گەیشتنی بەم ئاستەی ئێستا.