پارتی لە نەینەوا: لە شێوازی دابەشکردنی پۆستەکان نیگەرانین

ئاڤا نیوز

 

پارتی لە شێوازی دابەشکردنی لیژنەکانی ئەنجوومەنی پارێزگای نەینەوا نیگەرانە و پێیوایە درێژەپێدەری ئەو هەڵمەتەیە کە لە بەغدا دژی حیزبەکە دەستیپێکردووە.

 

وێنە گەورەکە: لیژنەکانی ئەنجوومەنی پارێزگای نەینەوا دابەشکران و پارتی سەرەڕای ئەوەی براوەی دووەمی پارێزگاکەیە، تەنیا سەرۆکایەتی دوو لیژنەی پێدراوە، ئەوانیش لیژنەکانی مافی مرۆڤ و کشتوکاڵن.

 

لێدوانی فەرمی: مەناف حەسەن، بەرپرسی نووسینگەی ھەڵبژاردنەکانی پارتی لە مووسڵ بە ئاڤا نیوزی گوت: "پارتی لە هەموو لایەکەوە دژایەتی دەکرێت، لە نەینەوا هێزی دووەمین و دەبوایە پۆستی سەرۆکی ئەنجوومەنی پارێزگا وەرگرین بەڵام جێگری پارێزگارمان پێدرا؛ تەنیا سەرۆکایەتی دوو لیژنەمان پێدراوە کە خۆی دەبوایە چوار بۆ پێنج لیژنەبوایە". 

 

زانیاریی زیاتر: شاندێکی پارتی لە بەغدان بۆ یەکلاکردنەوەی چەند پرسێک، وەرگرتنی پۆست لە نەینەوا یەکێک دەبێت لە پرسە سەرەکییەکان.

 

ئەوەی پێویستە بیزانیت: لە هەڵبژاردنی ئەنجوومەنی پارێزگاکانی عێراق، پارتی توانی چوار کورسی نەینەوا بەدەستبهێنێت و بووە هێزی دووەمی پارێزگاکە.