ئەپیكۆر: خۆشحاڵین گفتوگۆكانی هەرێمی كوردستان و عێراق بۆ هەناردەكردنەوەی نەوت بە باشی بەڕێوەدەچن

ئاڤا نیوز

کۆمەڵەی پیشەسازیی نەوتی کوردستان 'ئەپیکۆر'  بڵاویكردووەتەوە، پشتیوانیی لە پرۆسەی هەناردەکردنەوەی نەوتی کوردستان دەکەن، بۆ ئەم ئەركەش ئامادەن.

ڕاگەیێنراوی فەرمی: ئەپیكۆر لە هەژماری فەرمیی خۆی لە تۆڕی كۆمەڵایەتی 'ئێكس' پەیامێكی بڵاوكردووەتەوە و ڕایگەیاندووە، "خۆشحاڵن بەوەی گفتوگۆکانی نێوان هەولێر و بەغدا چڕکراونەتەوە بۆ گەیشتن بە ڕێککەوتنێک لەبارەی هەناردەکردنەوەی نەوت لەڕێگەی بۆری نەوتی هەرێمی کوردستان ITP لەكاتێكی نزیكدا."

کۆمەڵەی پیشەسازیی نەوتی کوردستان جەخت لە پێویستی پابەندبوون بە ڕێككەوتنەكان دەكاتەوە كە مەرج و ڕێساكان و ماف و ئەركەكان وەك خۆی لەبەرچاو بگیرێن.

هاوكات سەرجەم قەرزی كۆمپانیاكانی نەوتیش بدرێتەوە كە لەسەر حكومەتی هەرێمی كوردستان ماون، جا چ بەڕێگەی نەختینەیی بێت یاخود گلدانەوەی بەشێك لە نەوتی بەرهەمهێنراوی كێڵگە نەوتییەكان كە كاری تێدا دەكەن.

زانیاریی زیاتر: ئەپیكۆر جەخت لە پشتیوانیی هەناردەکردنەوەی نەوتی کوردستان دەكاتەوە و دەڵێت، "ئامادەین دەستبەجێ دەست بە هەناردەکردنەوەی نەوت بکەینەوە."