فەرماندەیەکی سەربازی داوا دەکات چەکدانانی پەکەکە شنگالیش بگرێتەوە

ئاڤا نیوز

فەرماندەیەکی سەربازی عێراق لە قەزای شنگال، داوا دەکات ناوچەکەیان بخرێتە ناو ئەو ڕێککەوتنەی کە لەنێوان پارتی کرێکارانی کوردستان (پەکەکە) و تورکیادا هەیە سەبارەت بە چەکدانان لە قەزاکە و ناوچەکانی دەوروبەری.

وێنە گەورەکە: لە چوارچێوەی پرۆسەی ئاشتی لەنێوان حکومەتی تورکیا و پەکەکە، وەک هەنگاوێکی سەرەتایی بەرەو چەکدانان و کۆتاییهێنان بە کردەوە سەربازییەکان ڕۆژی 2025-07-11، لە ڕێوڕەسمێکدا لە ئەشکەوتی "جاسەنە" لەنێوان قەزای دوکان و شاری سلێمانی، نزیکەی 30 گەریلای پەکەکە، چەکەکانیان دانا و سووتاندیان.

لێدوانی فەرمی: ئەو فەرماندەیە کە نەیویست ناوی ئاشکرا بکرێت، لە لێدوانێکیدا بە میدیای عێراقی ڕایگەیاند: "ئەم داواکارییە لەبەر ئەوە دێت کە ژمارەیەک گرووپی چەکدار لەوێ چالاکن و لەژێر فەرمانی پەکەکەن"، وتیشی: "تا ئێستا هیچ زانیارییەکی ڕوون سەبارەت بە چارەنووسی بوونی پەکەکە لە شنگال لە چوارچێوەی ڕێککەوتنەکەدا نەخراوەتەڕوو."

ئەوەی پێشبینی دەکرێت: ئەو فەرماندە سەربازییە پێشبینیی ئەوەی کرد کە پرۆسەی چەکدانانەکە، کە چاوەڕوان دەکرێت نزیکەی سێ مانگ بخایەنێت، شنگالیش بگرێتەوە و ئەمەش لەوانەیە ببێتە هۆی کشانەوەی حزبەکە و گرووپە گرێدراوەکانی لە ناوچەکە، ئەگەر لێکتێگەیشتنێکی گشتگیر لەنێوان هەردوولادا بەدی بێت.

ئەوەی پێویستە بیزانیت: عەبدوڵڵا ئۆجەلان، ڕێبەری پەکەکە، ڕۆژی چوارشەممەی ڕابردوو ڕایگەیاندبوو کە حزبەکەی وازی لە بیرۆکەی دامەزراندنی دەوڵەتی نەتەوەیی بۆ کورد لە تورکیا هێناوە، لە پەیامێکی ڤیدیۆییدا لە زیندانەوە وتی: "چەکدانان سەرکەوتنێکی مێژووییە و لەگەڵیدا قۆناغی پراکتیزەکردنی یاسا و سیاسەت دەستی پێکرد."

ئەمەش بزانە: لەسەر داوای عەبدوڵڵا ئۆجەلان کە لە مانگی شووباتی ڕابردوودا لە زیندانی ئیمراڵییەوە داوای لە گەریلاکانی کردبوو چەک دابنێن، پەکەکە لە 12ـی ئایاردا هەڵوەشاندنەوەی خۆی و چەکدانانی ڕاگەیاند و بەوەش کۆتایی بە زیاتر لە چوار دەیە لە خەباتی چەکداری هێنا.