لە هەولێر قۆناغی یەکەمی دابەشکردنی زەویی فەرمانبەران دەستپێدەکات

ئاڤا نیوز

بڕیارە سبەی سێشەممە 15-7-2025، لە بەڕێوەبەرایەتیی گشتیی شارەوانییەکانی هەولێر، قۆناغی یەکەمی دابەشکردنی زەویی فەرمانبەران دەستپێبکات.

وێنە گەورەکە: مەراسیمی دابەشکردنی زەوی بڕیارە کاتژمێر 2:30ـی نیوەڕۆ بە ئامادەبوونی وەزیری شارەوانی و گەشتوگوزار و پارێزگاری هەولێر بەڕێوەبچێت.

لێدوانی فەرمی: مەریوان حاکم هادی، بەڕێوەبەری گشتیی شارەوانییەکان، بە ئاڤا میدیای ڕاگەیاند، "سبەی تیروپشک بۆ دابەشکردنی دوو هەزار و 895 زەوی لە سنووری شارەوانی بەحرکە دەکەین"، ئەو کەسانەی زەوی وەردەگرن، فەرمانبەر و خانەنشین و کارمەندی هێزە ئەمنیەکانن.

زانیاریی زیاتر: بەڕێوەبەرایەتیی گشتیی شارەوانییەکانی هەولێر کە 37 سەرۆکایەتیی شارەوانی قەزا و ناحیەکانی سنووری پارێزگای هەولێر لەخۆدەگرێت، ڕێکار و ئامادەکارییەکان بۆ دابەش کردنی زەوی بەسەر فەرمانبەران لە سنووری زۆربەی ئەو شارەوانییانە تەواو کراون.

ئەوەی پێویستە بیزانیت: لە ماوەی کەمتر لە دوو مانگی داهاتوو نزیکەی هەشت هەزار پارچە زەوی دیکە ئامادە دەکرێن، بۆ ئەوەی سەرجەم ئەو فەرمانبەرانەی لەو سنوورە شایستەن و مەرج و پێوەرکانی پێدانی زەوی دەیانگرێتەوە پارچەیەک زەوییان پێبدرێت.