كۆمكاری عەرەبی بەتووندی سەركۆنەی هێرشەكانی سەر هەولێر دەكات

ئاڤا دیجیتاڵ

 

كۆمكاری عەرەبی ئەمڕۆ كۆبوەوە و هێرشی ئێرانی بۆسەر هەولێر بە تووندی سەركۆنە كرد، هەروەها بەرپرسیارێتی هەر كاردانەوەیەكی هێرشەكەی خستە ئەستۆی ئێران.

چیرۆكە سەرەكییەكە: بەگوێرەی ڕاگەیەندراوێكی كۆمكاری عەرەبی "كۆمكاری عەرەبی ئێران بە بەرپرسیار دەزانێت لە دەستدرێژیكردنە سەر خاكی عێراق دووبارە بوونەوەشی بە مەترسی گەورە بۆ ناوچەكە ناودەبات".

بەگوێرەی ڕاگەیێندراوی كۆمكاری عەرەبی "یەكێتی و سەروەری خاكی عێراق گرنگە و مافی عێراقە وەك ئەندامێكی كۆمكارەكە و نەتەوەیەكگرتووەكان پەنا بۆ هەر ڕێگەیەكی دیپلۆماسی و یاسایی ببات لەڕووی نێودەوڵەتییەوە بۆ بەرپەرچدانەوەی ئەو هێرشانە".

ئەوەی پێویستە بیزانیت: ڕۆژی سێشەممە 16-1-2024 ڕۆژێك دوای هێرشەكانی ئێران بۆسەر هەولێر، سكاڵایەكی دژ بە ئێران بردە ئەنجومەنی ئاسایشی نێودەوڵەتی و نەتەوەیەكگرتووەكان، وەزارەتی دەرەوەی عێراق لەڕێگەی دوو نامەوە سكاڵاكەی ئاراستەی هەردوو دامەزراوە نێودەوڵەتییەكە كردووە لە نیویۆرك و تێیدا هێرشەكەی ئێران بە "پێشێلكاری سەروەری عێراق و سەلامەتی ئاسایشی عێراق و گەلەكەی تۆمەتباری دەكات".

باكگراوند: شەوی دووشەمە 15-1-2024 كاتژمێر 11:30 خولەك سوپای پاسدارانی ئێران بە ژمارەیەك مووشەكی بالیستی هێرشی كردە سەر چەند ناوچەیەكی مەدەنیی لە هەولێر كە بووە هۆی گیان لەدەستدانی پێنج كەس و برینداربوونی شەش كەسی دیكە.